- ఉద్యోగులను, అధికారులను ప్రత్యేకంగా అభినందించిన ఎండీ
నవతెలంగాణ-సిటీబ్యూరో
జలమండలికి తెలంగాణ వాటర్‌ కన్జర్వేషన్‌ అవార్డు - 2021 దక్కింది. ఉత్తమ ప్రభుత్వ, ప్రైవేటు సంస్థల కేటగిరిలో తెలంగాణ వాటర్‌ రిసోర్సెస్‌ డెవెలప్‌మెంట్‌ కార్పొరేషన్‌ ఈ అవార్డును జలమండలికి అందించింది. నగరవాసులకు నీటి సంరక్షణపై అవగాహన కల్పించ డానికి గాను నీటి సంరక్షణ పద్ధతులను వివరిస్తూ రెయిన్‌ వాటర్‌ హార్వెస్టింగ్‌ థీమ్‌ పార్కు నిర్మించడం, ఎన్జీవోల భాగస్వామ్యంతో వాక్‌, జలం-జీవం లాంటి అవగాహన కార్యక్రమాలు నిర్వహించడంతో పాటు ఇంకుడు గుంతలు నిర్మించి ప్రతీయేటా పునరుద్ధరణ చేపట్టడం వంటి కార్యక్రమాలు నిర్వహించినందుకు జలమండలిని ఈ అవార్డుకు ఎంపిక చేసింది.
గురువారం జలమండలి కార్యాలయంలో ఎండీ దానకిశోర్‌కు జలమండలి ప్రాజెక్ట్‌ డైరెక్టర్‌ శ్రీధర్‌బాబు ఈ అవార్డును అందించారు. జలమండలికి అవార్డు దక్కడం పట్ల దానకిశోర్‌ హర్షం వ్యక్తం చేశారు. ఇందుకు కృషి చేసిన జలమండలి అధికారులు, సిబ్బందిని ఎండీ ప్రత్యేకంగా అభినందించారు. అంతకుముందు ఖైరతాబాద్‌లోని ఇన్‌స్టిట్యూట్‌ ఆఫ్‌ ఇంజనీర్స్‌లో జరిగిన కార్యక్రమంలో వైద్యారోగ్య శాఖ మంత్రి హరీష్‌రావు, ఎమ్మెల్సీ పల్లా రాజేశ్వర్‌ రెడ్డి, తెలంగాణ వాటర్‌ రిసోర్సెస్‌ డెవెలప్‌మెంట్‌ కార్పొరేషన్‌ చైర్మెన్‌ వి.ప్రకాశ్‌రావు చేతుల మీదుగా జలమండలి ప్రాజెక్ట్‌ డైరెక్టర్‌ శ్రీధర్‌బాబు ఈ అవార్డును అందుకున్నారు.
