- డిప్యూటీ మేయర్‌ను కలిసిన సాయి ఐశ్వర్య కాలనీ వాసులు
నవతెలంగాణ-బోడుప్పల్‌
తమ కాలనీలో ఉన్న పార్క్‌ స్థలాన్ని కాపాడి రక్షణగా ఫెన్సింగ్‌ ఏర్పాటు చేసేలా సహకారం అందించాలని పీర్జాదిగూడ కార్పొరేషన్‌ 3వ డివిజన్‌ శ్రీసాయి ఐశ్వర్య కాలనీ వాసులు కార్పొరేషన్‌ డిప్యూటీ మేయర్‌ కుర్ర శివకుమార్‌ గౌడ్‌ను కలిసి వినతిపత్రం అందించారు.
ఈ సందర్భంగా కాలనీ వాసులు మాట్లాడుతూ ... తమ కాలనీలోని రోడ్‌ నెం.18లో గల పార్క్‌ స్థలం అన్యాక్రాంతమవుతుందని మునిసిపల్‌ అధికారుల అండతో కబ్జాదారులు కాలనీవాసులను ఇబ్బందులకు గురిచేస్తు న్నారని, తమను ఇబ్బందుల నుండి కాపాడి పార్క్‌ స్థలాన్ని రక్షించాలని కోరారు. ఈ మేరకు కాలనీ అసోసియేషన్‌ అధ్యక్షురాలి ఆధ్వర్యంలో అన్ని డివిజన్ల కార్పొరేటర్లను కలిసి వినతిపత్రాలు అందించినట్లు తెలిపారు. పార్కు స్థలాలను కాపాడడానికి తమకు సహకరించాలని విజ్ఞప్తి చేశారు. పార్క్‌ స్థలాన్ని పరిరక్షించడం కోసం కౌన్సిల్‌లో తీర్మానం చేసిన విధంగా 4 ఎకరాల 11 గుంటల పార్క్‌ స్థలానికి కంచె ఏర్పాటు చేయాలని విన్నవించారు. డిప్యూటీ మేయర్‌ను కలిసిన వారిలో బి.సరితాదేవి, దయాకర్‌రెడ్డి, పద్మారెడ్డి, ఇంద్రారెడ్డి, శ్రీనివాస్‌ రెడ్డి, సుభాష్‌ రెడ్డి, రాజేందర్‌ రెడ్డి తదితరులు పాల్గొన్నారు.
