నవతెలంగాణ-హైదరాబాద్
ఇటీవల పదో తరగతి పరీక్షలు రాసి, ఫలితాల కోసం ఎదురు చూస్తున్న ఓ విద్యార్థి అనుమానాస్పదంగా ఆత్మహత్య చేసుకున్నాడు. ముషీరాబాద్‌ పోలీస్‌ స్టేషన్‌ పరిధిలో చోటు చేసుకున్న ఈ సంఘటనకు సంబంధించిన వివరాలు ఎస్‌ఐ కృష్ణయ్య తెలిపిన ప్రకారం ఇలా ఉన్నాయి. రాంనగర్‌ శ్రీనివాస్‌ టెక్స్‌టైల్‌ సమీపంలోని మేడిబాచి బస్తీకి చెందిన జాన్‌ డేవిడ్‌ (16 ) ఈఏడాది పదో తరగతి పూర్తి చేశాడు. తండ్రి మరణించగా, తల్లి సూపర్‌ మార్కెట్లో పనిచేస్తోంది. సోమవారం సాయంత్రం 5.30 గంటల సమయంలో తల్లి సూపర్‌ మార్కెటకు వెళ్లగా, అన్నయ్య కళాశాలకు వెళ్లగా ఇంట్లో ఎవరూ లేని సమయంలో చున్నీతో ఫ్యాన్‌కు ఉరివేసుకుని చనిపోయాడు. సమాచారం తెలుసుకున్న ముషీరాబాద్‌ పోలీసులు గాంధీ ఆస్పత్రికి పోస్టుమార్టం కోసం తరలించారు. అనంతరం కుటుంబ సభ్యులకు అప్పగించారు. విద్యార్థి మరణానికి ఎలాంటి కారణాలు తెలియడం లేదని ఎస్‌ఐ కృష్ణయ్య తెలిపారు. అయితే మరో రెండు, మూడ్రోజుల్లో రానున్న పదో తరగతి ఫలితాలకు జాన్‌ డేవిడ్‌ చావుకు ఎలాంటి సంబంధం లేదన్నారు. మరిన్ని వివరాలకు జాన్‌ డేవిడ్‌ ఫోన్‌ కాల్‌ డేటా వచ్చిన తర్వాత తెలిసే అవకాశం ఉందన్నారు.
