నవతెలంగాణ-అంబర్‌పేట
భారత్‌ జోడో కార్యక్రమంలో భాగంగా ఆలిండియా అండర్‌-19, 20-20 క్రికెట్‌ టోర్నమెంట్‌ పోటీలను అంబర్‌పేట్‌లోని వాటర్‌ వర్క్స్‌ గ్రౌండ్‌ లో తెలంగాణ ప్రదేశ్‌ కాంగ్రెస్‌ కమిటీ అధ్యక్షులు రేవంత్‌ రెడ్డి బుధవారం ప్రారంభించారు. ఈ సందర్భంగా రేవంత్‌ రెడ్డి మాట్లాడుతూ భారత్‌ జోడో యాత్రలో రాహుల్‌ గాంధీ భారత్‌ జోడో, నఫరత్‌ తోడో అనే నినాదంతో ప్రజల మనసు గెలిచారనీ, అదే స్ఫూర్తితో వి.హనుమంతరావు భారత్‌ జోడో క్రికెట్‌ టోర్నమెంట్‌ను నిర్వహిస్తున్నారని పేర్కొన్నారు. అనంతరం కాంగ్రెస్‌ సీనియర్‌ నాయకులు వి.హనుమంతరావు మాట్లాడుతూ ఈ క్రికెట్‌ టోర్నమెంట్‌ లో వివిధ రాష్ట్రాల నుంచి 8 జట్లు పాల్గొంటాయన్నారు. కన్యాకుమారి నుంచి కాశ్మీర్‌ వరకు రాహుల్‌ గాంధీ పాదయాత్ర చేసి ప్రజలను కలుస్తూ వారి కష్ట సుఖాలను తెలుసుకున్నారని తెలిపారు. ఈ కార్యక్రమంలో కాంగ్రెస్‌ నాయకులు జేఎంహెచ్‌ హాసన్‌, ఆర్‌.లక్ష్మణ్‌ యాదవ్‌, జ్ఞానేశ్వర్‌ గౌడ్‌, శంభుల శ్రీకాంత్‌ గౌడ్‌, సయ్యద్‌ సాదిక్‌ పాషా, అమర్‌ జీత్‌ కుమార్‌, ఆది అవినాష్‌, రజినీకాంత్‌, తదితరులు పాల్గొన్నారు.
