నవతెలంగాణ-తుంగతుర్తి
పిడుగుపాటుకు,మేకలను మేపడానికి వెళ్లిన ఓ వ్యక్తితో పాటు మూడు మేకలు మరణించిన సంఘటన మండల కేంద్రంలో బుధవారం సాయంత్రం చోటు చేసుకుంది.వివరాలు ఇలా ఉన్నాయి...తుంగతుర్తి మండలకేంద్రానికి చెందిన వీరబోయిన భిక్షం, కుమారుడైన వీరబోయిన నాగయ్య(30) ఇద్దరు కలిసి గిరిజనసంక్షేమ గురుకులపాఠశాల వెనుక గల తమ వ్యవసాయ క్షేత్రంలో మేకలను మేపడానికి వెళ్లారు.సాయంత్రం వేళ అకస్మాత్తుగా ఉరుములు మెరుపులతో కూడిన వర్షం కురవడంతో నాగయ్య పక్కనే ఉన్న చెట్టు కిందకి వెళ్ళాడు.అదే సమయంలో పిడుగు పడటంతో అక్కడికక్కడే కుప్పకూలి చనిపోయాడు. తండ్రి బిక్షం కొద్ది దూరంలో ఉండటం వలన ప్రమాదం నుండి తప్పించుకోగలిగారు.మృతుడికి భార్య లక్ష్మి,ఒక బాబు,ఒక పాప ఉన్నారు.భార్య లక్ష్మి ఫిర్యాదు మేరకు కేసు నమోదు చేసి,పోస్టుమార్టం నిమిత్తం మృతదేహాన్ని ఆసుపత్రికి తరలించినట్లు ఎస్సై డానియల్‌కుమార్‌ తెలిపారు.