- సీపీఐ(ఎం) జిల్లా కార్యదర్శి ఎండి.జహంగీర్‌
నవతెలంగాణ-చౌటుప్పల్‌
మునుగోడు ఉప ఎన్నికల్లో టీఆర్‌ఎస్‌ ఎమ్మెల్యే అభ్యర్థి కూసుకుంట్ల ప్రభాకర్‌రెడ్డి గెలుపు లక్ష్యంగా ప్రతి కార్యకర్త సమిష్టిగా కృషిచేయాలని సీపీఐ(ఎం) జిల్లా కార్యదర్శి ఎమ్‌డి.జహంగీర్‌ పిలుపునిచ్చారు. మంగళవారం మున్సిపల్‌ కేంద్రంలోని 17వ వార్డులో సీపీఐ(ఎం), టీఆర్‌ఎస్‌ నాయకులతో కలిసి ఇంటింటి ప్రచారం నిర్వహించారు. ఈ సందర్భంగా ఆయన మాట్లాడుతూ తెలంగాణ ప్రజలతో బీజేపీ నాయకులు చెలగాటమాడుతున్నారన్నారు. కుల, మత రాజకీయాలకు తెలంగాణలో అడుగు పెట్టనీయకుండా తరిమికొట్టాల్సిన అవసరం ఉందన్నారు. పగటికలలు కంటున్న బీజేపీ నాయకులకు మునుగోడులో పట్టపగలే చుక్కలు లెక్కపెట్టుకునే విధంగా తీర్పు ఇవ్వాలన్నారు. కారు గుర్తుకు ఓట్లు వేసి కూసుకుంట్ల ప్రభాకర్‌రెడ్డిని భారీ మెజార్టీతో గెలిపించాలని కోరారు. ఈ కార్యక్రమంలో సీపీఐ(ఎం) మున్సిపల్‌ కార్యదర్శి బండారు నర్సింహా, డీవైఎఫ్‌ఐ రాష్ట్ర కార్యదర్శి ఆనగంటి వెంకటేశం, పస్తం గంగరాములు, ఎమ్‌డి.ఖయ్యుమ్‌, ఎమ్‌డి.ఖాసీమ్‌ పాల్గొన్నారు.
మునుగోడులో బీజేపీని ఓడించాలి
మునుగోడు ఉప ఎన్నికల్లో బీజేపీని ఓడించాలని సీపీఐ(ఎం) జిల్లా కార్యదర్శి ఎమ్‌డి.జహంగీర్‌ తెలిపారు. సోమవారం రాత్రి చౌటుప్పల్‌ మున్సిపల్‌ పరిధిలోని లింగారెడ్డిగూడెంలోని 1వ వార్డులో సీపీఐ(ఎం), టీఆర్‌ఎస్‌ నాయకులతో కలిసి ఆయన ఇంటింటి ప్రచారం నిర్వహించారు. ఈ సందర్భంగా జహంగీర్‌ మాట్లాడుతూ కేంద్రంలో బీజేపీ అనుసరిస్తున్న ప్రజా వ్యతిరేక విధానాలను ప్రజలకు వివరించారు. గ్యాస్‌, పెట్రోల్‌, డీజిల్‌, నిత్యావసర వస్తువుల ధరలు పెంచి పేదలపై అనేక భారాలు మోపుతున్న బీజేపీని చిత్తుగా ఓడించాలన్నారు. ఈ ఎన్నికల్లో బీజేపీని నిలువరిం చేందుకు కమ్యూనిస్టులు సైనికుల్లా పనిచేయాలని కోరారు. కారు గుర్తుకు ఓట్లు వేసి కూసుకుంట్ల ప్రభాకర్‌ రడ్డిని గెలిపించాలన్నారు. ఈ కార్యక్రమంలో సీపీఐ(ఎం) జిల్లా కార్యదర్శివర్గ సభ్యులు కల్లూరి మల్లేశం, మున్సిపల్‌ కార్యదర్శి బండారు నర్సింహా, డీవైఎఫ్‌ఐ రాష్ట్ర కార్యదర్శి ఆనగంటి వెంకటేశ్‌, టీఆర్‌ఎస్‌ వార్డు అధ్యక్షులు తొర్పునూరి మల్లేశ్‌గౌడ్‌, నాయకులు తొర్పునూరి నర్సింహా గౌడ్‌, ఉష్కాగుల శ్రీను, వెంకటేశ్‌, ఊదరి నర్సింహా, తొర్పునూరి మల్లేశ్‌, బాలకృష్ణ, లింగస్వామి పాల్గొన్నారు.
