- నియోజకవర్గాన్ని మరింత అభివృద్ధి చేసుకుందాం..
- టీఆర్‌ఎస్‌ అభ్యర్థి కూసుకుంట్ల ప్రభాకర్‌రెడ్డి
నవతెలంగాణ-చండూర్‌
సంకేమ సర్కారు కారు గుర్తును గెలిపిద్దాం..మునుగోడు నియోజకవర్గాన్ని మరింత అభివృద్ధి చేసుకుందామని టీఆర్‌ఎస్‌ అభ్యర్థి కూసుకుంట్ల ప్రభాకర్‌రెడ్డి అన్నారు. మునుగోడు ఉపఎన్నికల ప్రచారంలో భాగంగా సోమవారం మండలంలోని చామలపల్లి, తుమ్మలపల్లి గ్రామాలలో ఎన్నికల ప్రచారం ముమ్మరంగా నిర్వహించారు. ఈ సందర్భంగా గ్రామ ప్రజలు, నాయకులు, కార్యకర్తలు, మహిళలు పెద్ద సంఖ్యలో హాజరై, టపాసులు పేల్చుతూ, డప్పు చప్పుళ్లతో సాదరంగా ఆహ్వానించారు. బోనాలు, బతుకమ్మలు ఎత్తుకొని, మంగళ హారతులతో, ఘనంగా స్వాగతం పలికారు. గ్రామశాఖ ఆధ్వర్యంలో శాలువలతో సన్మానించారు. యాదవులు గొంగిడి కప్పి, గొర్రెపిల్లను బహుకరించారు. ఈ సందర్భంగా ప్రభాకర్‌రెడ్డి మాట్లాడుతూ..సీఎం కేసీఆర్‌ 2014 లో దీవించి, ఎమ్మెల్యే టికెట్‌ ఇస్తే, మీరు అంతా ఆశీర్వదించి మొదటిసారి ఎమ్మెల్యే గా గెలిపించినందుకుగాను నియోజకవర్గంలో అభివృద్ధి పనులు పూర్తి చేశానన్నారు. 2018 లో ఓడిపోయినా మీ మధ్యనే ఉన్న 365 రోజులలో 300 రోజులు నిత్యం ప్రజల్లో ఉండి ప్రజా సేవలో పని చేశానని తెలిపారు. చౌటుప్పల్‌లో మిషన్‌ భగీరథ పైలాన్‌ నిర్మించుకొని, ఇంటింటికి నల్లాలు ఇచ్చి త్రాగునీరు కొరత తీర్చినం, నియోజకవర్గంలో ప్లోరోసిస్‌ భూతాన్ని తరిమికొట్టిన గణత సీఎం కేసీఆర్‌ కే దక్కిందన్నారు. నేను మీ ఊరి బిడ్డగా అడుగుతున్న నన్ను ఆశీర్వదించండి..అభివృద్ధి చేసి,చూపిస్తా. భారీ మెజారిటీతో కారును గెలిపించి కేసీఆర్‌కి కానుకగా ఇచ్చి మునుగోడును అభివృద్ధి చేసుకుందామన్నారు. ఈ కార్యక్రమంలో కూకట్‌పల్లి ఎమ్మెల్యే మాధవరం కృష్ణారావు, రామగుండం ఎమ్మెల్యే కోరుకంటి చందర్‌, మండల, స్థానిక ప్రజాప్రతినిధులు, పార్టీ ముఖ్యనాయకులు, కార్యకర్తలు, ఇన్ఛార్జ్‌ నాయకులు, సీపీఐ, సీపీఐ(ఎం) ముఖ్య నాయకులు పాల్గొన్నారు.
నాకు అవకాశం ఇవ్వండి అభివృద్ధి చేస్తా
మర్రిగూడ:మునుగోడు ఉపఎన్నికల్లో టీఆర్‌ఎస్‌ అభ్యర్థిగా గెలిపించి మునుగోడు అభివృద్ధికి అవకాశం ఇవ్వండని టీఆర్‌ఎస్‌ అభ్యర్థి కూసుకుంట ప్రభాకర్‌రెడ్డి అన్నారు. సోమవారం మర్రిగూడ మండలం తమ్మడపల్లి గ్రామంలో ఎన్నికల ప్రచారం సందర్భంగా ఆయన మాట్లాడారు. తెలంగాణలో ప్రభుత్వాన్ని కూల్చాలనే ఉద్దేశంతో టీఆర్‌ఎస్‌ ఎమ్మెల్యేలతోని బీజేపీ ప్రభుత్వం బేరసారాలకు దిగుతుందని ఇది వారి దిగజారుడుతనానికి నిదర్శనమన్నారు. ఒకసారి ప్రతిపక్ష ఎమ్మెల్యేగా గెలిచి ఏం చేయలేని రాజగోపాల్‌ రెడ్డి మరో ప్రతిపక్ష ఎమ్మెల్యే గెలిచి ఎలా అభివృద్ధి చేస్తాడో చెప్పాలని డిమాండ్‌ చేశారు. మునుగోడు అన్ని విధాలుగా అభివృద్ధి చెందాలంటే నవంబర్‌ మూడున జరిగే ఉప ఎన్నికల్లో తనను గెలిపించి మునుగోడు అభివృద్ధికి తోడ్పడాలని కోరారు. ఈ కార్యక్రమంలో ఎమ్మెల్యే జోగు రామన్న, ఎంపీటీసీ రాజమణి హరికృష్ణ, అధ్యక్షులు కొట్టం శివయాదy,్‌ తదితరులు పాల్గొన్నారు.