- మరో కార్మికునికి తీవ్ర గాయాలు
నవతెలంగాణ- కేతపల్లి
గ్రామపంచాయతీ ట్రాక్టర్‌ బోల్తా పడడంతో కార్మికుడు మృతి చెందగా, మరో కార్మికునికి తీవ్ర గాయాలైన సంఘటన కేతపల్లి మండలంలోని చెరుకుపల్లి గ్రామంలో గురువారం జరిగింది. పోలీసుల తెలిపిన వివరాలు ఇలా... చెరుకుపల్లి గ్రామంలో గ్రామపంచాయతీ ట్రాన్స్‌ఫార్మర్‌ కాలిపోవడంతో దానిని బాగు చేయించేందుకు గ్రామ పంచాయతీ ట్రాక్టర్‌ లో నకిరేకల్‌ తీసుకువెళ్లారు. దానిని రిపేరు చేయించుకొని నకిరేకల్‌ నుండి తిరిగి చెరుకుపల్లికి వస్తున్న క్రమంలో బండ పాలెం గ్రామ శివారులోకి రాగానే ట్రాక్టర్‌ అదుపుతప్పి రోడ్డు వెంట ఉన్న గోతిలో బోల్తా పడింది. ఈ ప్రమాదంలో ట్రాక్టర్‌ డ్రైవర్‌, గ్రామపంచాయతీ మల్టీ పర్పస్‌ వర్కర్‌ నున్న జానయ్య వయసు 44 అక్కడికక్కడే మృతి చెందాడు. ట్రాక్టర్‌ పైన ఉన్న మరో గ్రామపంచాయతీ మల్టీపర్పస్‌ వర్కర్‌ పొదిళ్ల యాదగిరి తీవ్రంగా గాయపడ్డాడు.మృతదేహాన్ని పోస్టుమార్టం నిమిత్తం నకిరేకల్‌ ప్రభుత్వ ఆసుపత్రికి తరలించి, గ్రామపంచాయతీ సెక్రటరీ మేకల వెంకట లక్ష్మీనారాయణ ఫిర్యాదు మేరకు కేసు నమోదు చేసుకుని దర్యాప్తు చేస్తున్నామని ఎస్సై అనిల్‌ రెడ్డి తెలిపారు.