నవతెలంగాణ- నేరేడుచర్ల
           ఈనెల 19న నడిగూడెంలో జరగనున్న ఏఐటీయూసీ సూర్యాపేట జిల్లా రెండో మహాసభలను జయప్రదం చేయాలని ఆ సంఘం జిల్లా ప్రధాన కార్యదర్శి మేకల శ్రీనివాసరావు కోరారు. జిల్లా మహాసభల కరపత్రాలు గురువారం మండలకేంద్రంలో విడుదల చేశారు. ఈ సందర్భంగా ఆయన మాట్లాడుతూ .కేంద్రంలో నరేంద్ర మోడీ నాయకత్వంలోని బిజెపి ప్రభుత్వం కార్మికులు ప్రజల త్యాగాల తో నిర్మించిన ప్రభుత్వ రంగ సంస్థలను కారు చౌకగా అంబానీ, అదాని వంటి కార్పొరేట్‌ పెట్టుబడిదారులకు కట్టబెడుతున్నదన్నారు. ఈ మహాసభకు ఏఐటీయూసీ రాష్ట్ర అధ్యక్షులు ఎం బాలరాజు సిపిఐ రాష్ట్ర కార్యవర్గ సభ్యులు గన్నా చంద్రశేఖర్‌ సిపిఐ సూర్యాపేట జిల్లా కార్యదర్శి బెజవాడ వెంకటేశ్వర్లు హాజరవుతున్నారని తెలిపారు. ఈ కార్యక్రమంలో తెలంగాణ వ్యవసాయ కార్మిక సంఘం సూర్యాపేట జిల్లా ప్రధాన కార్యదర్శి ధూళిపాళ ధనుంజయ నాయుడు, ఏఐటీయూసీ జిల్లా ఆర్గనైజింగ్‌ సెక్రెటరీ త్రిపురం సుధాకర్‌ రెడ్డి, ఏఐవైఎఫ్‌ జిల్లా అధ్యక్షుడు చిలక రాజు శ్రీను, ఏఐటీయూసీ నాయకులు అయిల నాగేశ్వరరావు గైగుళ్ళ శ్రీరాములు, వజ్రాల లింగాచారి, పర్సనబోయిన వెంకన్న నాగ చారి తదితరులు పాల్గొన్నారు.