- రాజకీయపార్టీలకతీతంగా అభివృద్ధిలో భాగస్వాములు కావాలి
- మునుగోడు ఎమ్మెల్యే కూసుకుంట్ల ప్రభాకర్‌రెడ్డి
నవతెలంగాణ-చౌటుప్పల్‌
చౌటుప్పల్‌ ప్రాంత అభివృద్ధే తన లక్ష్యమని మునుగోడు ఎమ్మెల్యే కూసుకుంట్ల ప్రభాకర్‌రెడ్డి అన్నారు. ఆదివారం చౌటుప్పల్‌ పట్టణకేంద్రంలోని జయశ్రీ గార్డెన్‌లో మున్సిపాలిటీ వార్డుల అభివృద్ధి సమావేశం మున్సిపల్‌ చైర్మెన్‌ వెన్‌రెడ్డి రాజు అధ్యక్షతన నిర్వహించారు. ఈ సమావేశానికి ఎమ్మెల్యే ముఖ్య అతిథిగా హాజరై మాట్లాడారు. రాజకీయపార్టీలకతీతంగా ఈ ప్రాంత అభివృద్ధిలో అందరూ భాగస్వాములు కావాలన్నారు. చౌటుప్పల్‌ మున్సిపాలిటీని అన్ని రంగాల్లో అభివృద్ధి చేస్తానన్నారు. వార్డుల్లో అభివృద్ధి జరిగినప్పుడే ప్రజాప్రతినిధులకు గౌరవం దక్కుతుందన్నారు. మున్సిపాలిటీలోని సమస్యలను అంచెలంచెలుగా పరిష్కారం చేస్తానన్నారు. మునుగోడులో అభివృద్ధి కార్యక్రమాలు చేపట్టనున్నట్టు తెలిపారు. ఊరచెరువు నుండి పెద్దకాల్వ నిర్మాణం చేపట్టి డ్రయినేజీ సమస్య పరిష్కరిస్తామన్నారు. వార్డుల్లో సీసీ రోడ్లు, అండర్‌ గ్రౌండ్‌ డ్రయినేజీ నిర్మాణాలు చేపడ్తామన్నారు. త్వరలో ఇంటిగ్రేటెడ్‌ మార్కెట్‌ నిర్మాణ పనులకు శంకుస్థాపన చేయనున్నట్టు తెలిపారు. ఇండోర్‌ స్టేడియం నిర్మాణ పనులు పూర్తిచేస్తామన్నారు. చిన్నకొండూరు రోడ్డు నుండి సంగెం వరకు డబుల్‌ రోడ్డు నిర్మాణం చేపడ్తామన్నారు. వలిగొండ రోడ్డు వరకు సర్వీసు రోడ్డును పూర్తిచేస్తామన్నారు. సంబంధిత మంత్రుల సహకారంతో మునుగోడును అన్ని విధాలుగా అభివృద్ధి చేసేందుకు కషిచేస్తానన్నారు. ఇంటి పన్నులను సమీక్షించి పొరపాట్లను సరిదిద్ది పన్నులను తగ్గించే విధంగా చూడాలని మున్సిపల్‌ కమిషనర్‌ కోమటిరెడ్డి నర్సింహారెడ్డిని ఆదేశించారు. నిరంతరం ప్రజలకు అందుబాటులో ఉండి ప్రజా సేవకునిగా పనిచేస్తానని తెలిపారు. ఈ సమావేశంలో మున్సిపల్‌ వైస్‌ఛైర్మన్‌ బత్తుల శ్రీశైలం, మార్కెట్‌, సింగిల్‌విండో ఛైర్మన్లు బొడ్డు శ్రీనివాస్‌రెడ్డి, చింతల దామోదర్‌రెడ్డి, సీపీఐ(ఎం) మున్సిపల్‌ ఫ్లోర్‌లీడర్‌ గోపగోని లక్ష్మణ్‌గౌడ్‌, కౌన్సిలర్లు దండ హిమబిందుఅరుణ్‌కుమార్‌, బండమీది మల్లేశం, కొయ్యడ సైదులుగౌడ్‌, పోలోజు శ్రీధర్‌బాబు, కోరగోని లింగస్వామి, బొడిగె అరుణబాలకృష్ణగౌడ్‌, సుల్తాన్‌ రాజు, ఎమ్‌డి.బాబాషరీఫ్‌, సందగల్ల విజయసతీశ్‌గౌడ్‌, తాడూరి శిరీషపరమేశ్‌, ఉబ్బు వరమ్మవెంకటయ్య, కాసర్ల మంజులశ్రీనివాస్‌రెడ్డి, పోలోజు వనజ, శైలజ పాల్గొన్నారు.
