నవతెలంగాణ-మునగాల
మండలంలోని గణపవరం వాగు సమీపంలో అధ్వానంగా ఉన్న రోడ్డుకు వెంటనే మరమ్మతులు చేపట్టాలని రైతుసంఘం మండల అధ్యక్ష కార్యదర్శులు చందాచంద్రయ్య, దేశిరెడ్డి స్టాలిన్‌రెడ్డి కోరారు.గురువారం వారు విలేకర్లతో మాట్లాడారు. వాగుపై రోడ్డు గుంతల మయంగా మారిందన్నారు. బ్రిడ్జిపై ఇనుపసువ్వలు తేలి ప్రమాదాలు జరుగుతున్నాయని చెప్పారు.ఇనుపసువ్వలు వాహనాల టైర్లకు గుచ్చుకొని పంక్చర్లు అవుతున్నాయన్నారు.కొంతకాలంగా రహదారిపై నడవలేని పరిస్థితి దాపురించిందన్నారు.ముఖ్యంగా రాత్రి వేళల్లో ప్రయాణం మరింత కష్టంగా మారిందన్నారు.రోడ్డు సక్రమం గా లేని కారణంగా నిత్యం వందలాది మంది తిప్పలు పడుతున్నారని ఆవేదన వ్యక్తం చేశారు.ఈ విషయమై పలుమార్లు ఆర్‌అండ్‌బీ అధికారుల దృష్టికి తీసుకొచ్చినా పట్టించుకోవడం లేదన్నారు.వెంటనే రోడ్డుకు మరమ్మతులు జరిపించి ప్రయాణికుల ఇబ్బందులు తీర్చాలని డిమాండ్‌ చేశారు.
