- సీపీఐ(ఎం) జిల్లా కమిటీ సభ్యులు వెంకటేశ్వర్లు
నవతెలంగాణ-నార్కట్‌పల్లి
            మహిళలు అన్ని రంగాల్లో రాణించేలా చైతన్య పరచడం కోసమే ఐద్వా ఆధ్వర్యంలో సంక్రాంతి ముగ్గుల పోటీలు నిర్వహిస్తున్నట్టు సీపీఐ(ఎం) జిల్లా కమిటీ సభ్యులు రామోజు వెంకటేశ్వర్లు పేర్కొన్నారు. మండల పరిధిలోని ఔరవాణి గ్రామంలో సంక్రాంతి పర్వదినాన్ని పురస్కరించుకొని ఆదివారం సీపీఐ(ఎం), ఐద్వా, కల్లుగీత, రైతు సంఘం ఆధ్వర్యంలో ముగ్గుల పోటీలను నిర్వహించారు. ఈ ముగ్గుల పోటీలను ఆ గ్రామ ఎంపీటీసీ జయలక్ష్మి రామోజు ప్రారంభించారు. ఈ సందర్భంగా వారు మాట్లాడారు. గ్రామంలోని యువతులు, మహిళలు పెద్ద సంఖ్యలో పాల్గొని రంగురంగుల రంగవల్లికలు వేసి పోటీపడ్డారు. తెలంగాణ సాయుధ పోరాట యోధులు ఆ గ్రామ మాజీ సర్పంచ్‌ బైరు మల్లయ్య గౌడ్‌ జ్ఞాపకార్థం వారి కుమారులు మొదటి బహుమతి రూ.1,016 , రెండో బహుమతి 516, మూడో బహుమతి 216 రూపాయలు అందజేయగా ఆ గ్రామానికి చెందిన ఎక్కురి ఈదయ్య జ్ఞాపకార్థం ఆమె సతీమణి లక్ష్మమ్మ పాల్గొన్న ప్రతి ఒక్కరికి బహుమతులు అందజేశారు. ఈ కార్యక్రమంలో సీపీఐ(ఎం) మండల కార్యదర్శి చెరుకు పెద్దులు, ఆ గ్రామ కార్యదర్శి కల్లూరి కంఠమహేశ్వరం, వార్డు సభ్యులు రవికుమార్‌ మహిళలు, యువతులు పాల్గొన్నారు.