ఆదిసాయికుమార్‌ తాజాగా నటిస్తున్న చిత్రం 'టాప్‌గేర్‌'. కె.శశికాంత్‌ దర్శకుడు. లేటెస్ట్‌గా ఈ సినిమాలోని ఫస్ట్‌ సాంగ్‌ను రెడ్‌ ఎఫ్‌ఎమ్‌ ఆఫీసులో ఆదిసాయి కుమార్‌ సహా చిత్ర యూనిట్‌ అంతా కలిసి విడుదల చేశారు. సిద్‌ శ్రీరామ్‌ ఆలపించిన 'వెన్నెల వెన్నెల' అంటూ సాగే ఈ పాట శుక్రవారం రిలీజైంది. ఈ పాటలో రామజోగయ్య శాస్త్రి రాసిన లిరిక్స్‌ ఆకట్టుకుంటున్నాయి. హీరో,హీరోయిన్లపై చిత్రీకరించిన ఈ పాట మెలోడీయస్‌గా సాగుతూనే యూత్‌కి కనెక్ట్‌ అయ్యేలా ఉంది. సాంగ్‌లోని సన్నివేశాలు, మ్యూజిక్ పాటకు ప్రాణం పోశాయి.
ఈ సినిమాను శ్రీ ధనలక్ష్మి ప్రొడక్షన్స్‌ బ్యానర్‌ పై ఆదిత్య మూవీస్‌ అండ్‌ ఎంటర్‌టైన్‌మెంట్స్‌ సమర్పణలో కె.వి.శ్రీధర్‌ రెడ్డి భారీ బడ్జెట్‌తో నిర్మిస్తుండగా, రియా సుమన్‌ హీరోయిన్‌గా నటిస్తోంది. ప్రస్తుతం నిర్మాణాంతర పనులు జరుపుకుంటున్న ఈ సినిమాను డిసెంబరు 30న విడుదల చేయబోతున్నారు. ప్రేక్షకులను ఆకట్టుకునే కథాకథనాలతో రాబోతున్న ఈ సినిమా పక్కా కమర్షియల్‌ ఎంటర్‌టైనర్‌, థ్రిల్లింగ్‌ అంశాలతో ప్రేక్షకులను అలరించబోతుంది అని చిత్ర యూనిట్‌ తెలిపింది. బ్రహ్మాజీ, సత్యం రాజేష్‌, మైమ్‌ గోపి, నర్రా, శత్రు, బెనర్జీ, చమ్మక్‌ చంద్ర, రేడియో మిర్చి హేమంత్‌ తదితరులు నటిస్తున్న ఈచిత్రానికి కథ, స్క్రీన్‌ ప్లే, దర్శకత్వం: కె. శశికాంత్‌, సినిమాటోగ్రాఫర్‌: సాయి శ్రీరామ్‌, మ్యూజిక్: హర్షవర్ధన్‌ రామేశ్వర్‌, ఎడిటర్‌: ప్రవీణ్‌ పూడి, ఆర్ట్‌: రామాంజనేయులు, ఎగ్జిక్యూటివ్‌ ప్రొడ్యూసర్‌: గిరిధర్‌ మామిడిపల్లి.
