సుధీర్‌ బాబు హీరోగా భవ్య క్రియేషన్స్‌ పతాకంపై వి. ఆనంద ప్రసాద్‌ నిర్మించిన సినిమా 'హంట్‌'. మహేష్‌ దర్శకత్వం వహించారు. పోలీస్‌ నేపథ్యంలో హై వోల్టేజ్‌ యాక్షన్‌ థ్రిల్లర్‌గా తెరకెక్కుతోంది. ఈ సినిమా షూటింగ్‌ కంప్లీట్‌ అయ్యింది. దీనికి హాలీవుడ్‌ సినిమా యాక్షన్‌ డైరెక్టర్స్‌ వర్క్‌ చేయడం విశేషం. మార్వెల్‌ స్టూడియోస్‌ నిర్మించిన చాలా సినిమాలకు వర్క్‌ చేసిన రేనాడ్‌ ఫవెరో, బ్రయాన్‌ విజియర్‌ 'హంట్‌'లో స్టంట్స్‌ కంపోజ్‌ చేశారు. మూవీలో అవి హైలైట్‌ అవుతాయని మేకర్స్‌ చెప్పారు.
నిర్మాత వి. ఆనంద ప్రసాద్‌ మాట్లాడుతూ, 'హాలీవుడ్‌లో రేనాడ్‌ ఫవెరో, బ్రయాన్‌ విజియర్‌ చాలా సినిమాలకు వర్క్‌ చేశారు. ఇప్పుడు వస్తున్న 'జాన్‌ వీక్‌ 4'కి కూడా వాళ్ళే స్టంట్‌ కొరియోగ్రాఫర్స్‌. మా సినిమాలో వాళ్ళ ఫైట్స్‌ స్పెషల్‌ అట్రాక్షన్‌ కానున్నాయి. త్వరలో విడుదల తేదీ వెల్లడిస్తాం. ఆల్రెడీ విడుదలైన టీజర్‌, 'పాపతో పైలం...' పాటకు సూపర్‌ రెస్పాన్స్‌ వస్తోంది. యూట్యూబ్‌లో ట్రెండ్‌ అవుతున్నాయి' అని అన్నారు.
సుధీర్‌ బాబు పవర్‌ఫుల్‌ పోలీస్‌ ఆఫీసర్‌ రోల్‌లో కనిపించనున్న చిత్రమిది. ఆయనతో పాటు శ్రీకాంత్‌, 'ప్రేమిస్తే' భరత్‌ పోలీస్‌ ఆఫీసర్లుగా చేస్తున్నారు.
