మోహన్‌లాల్‌ హీరోగా నటించిన చిత్రం 'మాన్‌స్టర్‌'. ఈ చిత్రంలో మంచు లక్ష్మి కీలక పాత్ర పోషించారు.మిస్టరీ థ్రిల్లర్‌ కథతో దర్శకుడు వైసక్‌ ఈ చిత్రాన్ని రూపొందించారు. ఈ సినిమా డిస్నీఫ్లస్‌ హాట్‌స్టార్‌లో స్ట్రీమింగ్‌ అవుతోంది. ఈ సినిమా విశేషాలను మంచు లక్ష్మి మీడియాతో షేర్‌ చేసుకున్నారు.
'ఈ చిత్రంలో నేను మంజు దుర్గ అనే పాత్రలో నటించాను. చాలా మంచి క్యారెక్టర్‌ ఇది. ఈ సినిమాలో నటిస్తున్నప్పుడు నాకు చెప్పిన క్యారెక్టర్‌ చెప్పినట్లు రూపొందిస్తారా లేదా అనే అనుమానం ఉండేది. ఎందుకంటే స్క్రిప్ట్‌ దశలో చెప్పిన క్యారెక్టర్‌ చివరకు సినిమాలో ఉండదు. లక్కీగా నా క్యారెక్టర్‌ వరకు ఎలాంటి సీన్స్‌ తీసేయలేదు. మలయాళంలో నటిస్తున్నప్పుడు భాష పరంగా ఇబ్బందులు పడ్డాను. ఆ డైలాగ్స్‌ మనలా ఉండవు, చాలా లెంగ్తీ డైలాగ్స్‌ ఇచ్చారు. నేను చాలా ఎనర్జిటిక్‌గా సెట్స్‌కు వెళ్తే, డల్‌గా ఉండాలి మీ క్యారెక్టర్‌ అని చెప్పేవారు. ఈ పాత్ర మూడ్‌ను, లాంగ్వేజ్‌ను అర్థం చేసుకునేందుకు కొంత టైమ్‌ పట్టింది. మోహన్‌లాల్‌ ఒక లెజెండరీ నటుడు. బహుముఖ ప్రజ్ఞాశాలి కూడా. తెరపై ఎన్నో ప్రయోగాలు చేశారు. ఇప్పటికీ తన కెరీర్‌లో ఛాలెంజింగ్‌ మూవీస్‌ చేస్తున్నారు. మీతో సంవత్సరానికి ఒక సినిమాలో అయినా నటించాలని ఉందని నేను ఆయనతో అన్నాను. ఇప్పుడు ఆయన ఉన్న స్టేజ్‌లో నాకెందుకు ఇలాంటి వివాదాస్పద సబ్జెక్ట్‌ అనుకోవచ్చు. కానీ ఆయన సవాళ్లని స్వీకరిస్తారు. నా పై వచ్చే ట్రోల్స్‌ను, మీమ్స్‌ ఎంజారు చేస్తా. వాళ్లకు ఇంకేదైనా కొత్తగా క్రియేట్‌ చేసేందుకు క్లూ ఇవ్వాలని చూస్తుంటా. ప్రస్తుతం 'గ్యాంబ్లర్‌', 'లేచింది మహిళా లోకం', 'అగ్ని నక్షత్రం' తదితర చిత్రాల్లో నటిస్తున్నాను' అని మంచు లక్ష్మి తెలిపారు.
