నయనతార నాయికగా నటించిన హర్రర్‌ థ్రిల్లర్‌ 'కనెక్ట్‌'. ఈ చిత్రాన్ని రౌడీ పిక్చర్స్‌ పతాకంపై విఘ్నేష్‌ శివన్‌ నిర్మించారు. దర్శకుడు అశ్విన్‌ శరవణన్‌ ఈ చిత్రాన్ని రూపొందించారు. హర్రర్‌ థ్రిల్లర్‌ మూవీస్‌ రూపొందించడంలో దర్శకుడు అశ్విన్‌ శరవణన్‌కు మంచి పేరుంది. నయనతార నాయికగా ఆయన రూపొందించిన 'మయూరి' సినిమా తెలుగులోనూ మంచి విజయాన్ని సాధించింది. అలాగే తాప్సీ నాయికగా శరవణన్‌ తెరకెక్కించిన 'గేమ్‌ ఓవర్‌' కూడా సూపర్‌ హిట్‌ అయ్యింది. దీంతో 'కనెక్ట్‌' సినిమాపై అందరిలోనూ భారీ అంచనాలు ఏర్పడుతున్నాయి. ఈ సినిమాను గ్రాండ్‌గా యూవీ క్రియేషన్స్‌ తెలుగు ప్రేక్షకుల ముందుకు తీసుకొస్తోంది.
తాజాగా ఈ సినిమా ట్రైలర్‌ను విడుదల చేశారు. దేశంలో లాక్‌డౌన్‌ విధించడానికి 24 గంటల ముందు అంటూ ట్రైలర్‌ ప్రారంభమైంది. కుటుంబంతో సంతోషంగా ఉండే నయనతార జీవితం ఆమె కూతురు అమ్ముకు ప్రేతాత్మ ఆవహించడంతో ఆందోళనగా మారుతుంది. తానెంతో ప్రేమించే కూతురు విచిత్రంగా ప్రవర్తించడం, వింత శబ్దాలు చేయడంతో ఏం జరుగుతుందో నయనతారకు అర్థం కాని పరిస్థితి ఏర్పడుతుంది. ట్రైలర్‌లో కనిపించిన కొన్ని షాట్స్‌ భయపెడతాయి. దెయ్యాలు ఊరికే వెళ్లిపోవు అని చెప్పడం నయనతార తన కూతురును ఆత్మ నుంచి విడదీసేందుకు ఎంతగా శ్రమించాల్సి వచ్చిందనేది చూపిస్తోంది. మొత్తంగా ఈ ట్రైలర్‌ ఇలా ఉంటే సినిమా ఎంత గూస్‌ బంప్స్‌ తెప్పిస్తుందో తెలిపింది. ఈ చిత్రాన్ని ఈ నెల 22న తెలుగులో గ్రాండ్‌గా విడుదల చేసేందుకు యూవీ క్రియేషన్స్‌ సంస్థ సన్నాహాలు చేస్తోంది' అని చిత్ర బృందం తెలిపింది.
అనుపమ్‌ ఖేర్‌తోపాటు సత్యరాజ్‌, వినరు రారు, హనియ నఫిస కీలక పాత్రల్లో నటించిన ఈ చిత్రానికి సంగీతం - పృథ్వి చంద్రశేఖర్‌, సినిమాటోగ్రఫీ - మణికంఠన్‌ కృష్ణమాచారి, ఎడిటింగ్‌ - రిచర్డ్‌ కెవిన్‌.
