తమిళ ప్రేక్షకులకే కాదు తెలుగు వాళ్లకు దగ్గరైన కథానాయకుడిగా శివకార్తికేయన్‌కు మంచి గుర్తింపు ఉంది. ఆయన నటించిన 'మెరీనా' చిత్రం తెలుగులో విడుదలకు రెడీ అవుతోంది. ఇందులో ఒవియా నాయికగా నటించింది. పాండిరాజ్‌ దర్శకత్వం వహించగా, ఎస్‌.వి.ఆర్‌ మీడియా (ప్రై ) లిమిటెడ్‌ పతాకంపై నిర్మాత సి.జె.శోభ ఈ సినిమాను తెలుగులో అందిస్తున్నారు. ఈ నేపథ్యంలో ఆమె మాట్లాడుతూ, 'ఈ నెల 17న సినిమాను విడుదల చేయబోతున్నాం. చక్కటి కామెడీ డ్రామాతో ఆద్యంతం అలరింపజేసే ఈ సినిమాలో హీరోహీరోయిన్లు తమ తమ పాత్రలకు ప్రాణం పోశారు. తమిళంలో రెండు స్టేట్‌ ఫిలిం అవార్డులతో పాటు ప్రేక్షకుల రివార్డులను పొందిందీ చిత్రం. కనువిందుచేసే ఛాయాగ్రహణం, సంగీతం హైలైట్‌గా నిలుస్తాయి. తెలుగు ప్రేక్షకులను కూడా ఈ సినిమా ఆకట్టుకుంటుందన్న నమ్మకంతో ఫ్యాన్సీ రేట్‌కు ఎక్కువ డబ్బు పెట్టి కొన్నాం. నట్టి కుమార్‌ వారి డిస్ట్రిబ్యూషన్‌ ద్వారా సినిమాను విడుదల చేస్తున్నారు' అని అన్నారు.
అనేక అద్భుత చిత్రాల సృష్టికర్త పాండిరాజ్‌ దీన్ని మలచిన విధానం జనాన్ని థియేటర్లకు రప్పిస్తుంది. తప్పకుండా మా అంచనాలను నిలబెడుతుంది. ట్రైలర్‌ను విడుదల చేస్తున్నాం. పాటలను కూడా ఒకదాని తర్వాత ఒకటి ఆవిష్కరించబోతున్నాం అని తెలుగులో ప్రపంచ వ్యాప్తంగా ఈ సినిమాను పంపిణీ చేస్తున్న నిర్మాత నట్టికుమార్‌ చెప్పారు.
