కౌశిక్‌ బాబు, శాన్వి మేఘన జంటగా శ్రీమాన్‌ గువ్వడవెల్లి దర్శకత్వంలో ఎస్‌ 3 క్రియేషన్స్‌ బ్యానర్‌ పతాకం పై రచయిత డా. సదానంద్‌ శారద నిర్మిస్తున్న చిత్రం 'నేనే సరోజ'. ఉరఫ్‌ కారం చారు అనేది ఉప శీర్షిక. సుమన్‌, చంద్రమోహన్‌, ఆనంద్‌, చక్రపాణి ముఖ్య పాత్రల్లో నటిస్తున్న ఈ సినిమా షూటింగ్‌ పూర్తి చేసుకుని, ప్రస్తుతం పోస్ట్‌ ప్రొడక్షన్‌ పనుల్లో ఉంది.
ఈ సందర్బంగా నిర్మాత సదానంద్‌ శారద మాట్లాడుతూ, 'నేడు సమాజంలో జరుగుతున్న సంఘటనల నేపథ్యంలో ఈ చిత్రాన్ని తెరకెక్కిస్తున్నాం. ముఖ్యంగా ఆడపిల్లల పట్ల ఇంకా చూపుతున్న వివక్షతను ఎదురిస్తూ ఎదిగిన ఈ తరం ఆడపిల్ల కథ ఇది. ఈ పాత్రలో హీరోయిన్‌ శాన్వి మేఘన చక్కగా నటించింది. అలాగే హీరో కౌశిక్‌ బాబు నేటి తరం కుర్రకారుకు అద్దం పట్టే పాత్రలో ఆకట్టుకుంటాడు. తెలంగాణ గ్రామీణ జీవితానికి అద్దం పట్టేలా వరంగల్ కోట, ఇక్కడి ప్రధాన ప్రదేశాల్లో షూటింగ్‌ చేశాం. ఇందులో 'కారం చారు' అనేది ఈ సినిమా ద్వారా ఈ తరం అమ్మాయిలకు అస్త్రం కానుంది' అని తెలిపారు.
'ఆసక్తికరమైన కథ,కథనంతో తెరకెక్కిస్తున్న ఈ సినిమాను ఎక్కడ కాంప్రమైజ్‌ కాకుండా నిర్మాత సపోర్ట్‌ అందిస్తున్నారు. ఫిబ్రవరిలో సినిమాని విడుదల చేయడానికి సన్నాహాలు చేస్తున్నాం' అని దర్శకుడు శ్రీమాన్‌ గుమ్మడవెల్లి అన్నారు. ఈ చిత్రానికి కెమెరా : కర్ణ, సంగీతం : రమేష్‌ ముక్కెర, పాటలు : గోరేటి వెంకన్న, సుద్దాల అశోక్‌ తేజ, డా. కె సదానంద్‌, గానం : గీతా మాధురి, మాళవిక, మధుప్రియ, కథ, స్క్రీన్‌ ప్లే, మాటలు, నిర్మాత : డా . సదానంద్‌ శారద, దర్శకత్వం : శ్రీమాన్‌ గుమ్మడవెల్లి.
