కె.యస్‌.ఆర్‌ ప్రజెంట్స్‌ ఉదయ్‌, రవి క్రియేషన్స్‌ పతాకంపై శ్రీకాంత్‌ శ్రీరామ్‌ హీరోగా, హ్రితిక శ్రీనివాస్‌ హీరోయిన్‌గా, కమల్‌ కామరాజు, అజరు ఇతర పాత్రల్లో ఓ సినిమా రూపొందుతోంది. డాక్టర్‌ రవికిరణ్‌ గాడలే దర్శకత్వంలో డాక్టర్‌ ఉదరు కె.రెడ్డి పాల్వారు, డాక్టర్‌ శ్రీధర్‌ రెడ్డి కరెడ్డి ప్రొడక్షన్‌ నెం.1గా నిర్మిస్తున్న ఈ చిత్ర పూజా కార్యక్రమాలు రామానాయుడు స్టూడియోలో ఘనంగా జరిగాయి. ఈ చిత్ర ముహూర్తపు సన్నివేశానికి డైరెక్టర్‌ సుధీర్‌ వర్మ క్లాప్‌ కొట్టగా, హీరో సందీప్‌ మాధవ్‌ కెమెరా స్విచ్చాన్‌ చేశారు. దర్శకులు డాక్టర్‌ రవికిరణ్‌ గౌరవ దర్శకత్వం వహించారు.
ఈ సందర్భంగా మీడియాతో దర్శకుడు డాక్టర్‌ రవికిరణ్‌ గాడలె మాట్లాడుతూ, 'ఈ సినిమా కథ కొత్తగా ఉంటుంది. ఇలాంటి కథతో ఏ సినిమా రాలేదు. పోస్ట్‌ ట్రూమాటిక్‌ స్ట్రెస్‌ డిసార్డర్‌ కాన్సెప్ట్‌తో తెరకెక్కుతున్న సైకలాజికల్‌ థ్రిల్లర్‌ నేపథ్యంలో ఈ సినిమా ఉంటుంది. జనవరి 2 నుండి ఈ సినిమా రెగ్యులర్‌ చిత్రీకరణ ప్రారంభం కానుంది' అని తెలిపారు. 'డిఫరెంట్‌ కాన్సెప్ట్‌తో తెరకెక్కుతున్న ఈ మూవీ అన్ని వర్గాల ప్రేక్షకులకు కనెక్ట్‌ అవుతుందని నమ్ముతున్నాను. డైరెక్టర్‌ రవికిరణ్‌ తీసిన ఇండిపెండెంట్‌ చిత్రం 'ద రాంగ్‌ స్వైప్‌' చాలా బాగుంది. త్వరలో ఈ చిత్ర టైటిల్‌, ఫస్ట్‌ లుక్‌ విడుదల చేయబోతున్నారు' అని హీరో శ్రీరామ్‌ అన్నారు. హీరోయిన్‌ హ్రితిక శ్రీనివాస్‌ మాట్లాడుతూ, 'ఒక మంచి సినిమాలో నటిస్తున్నందుకు సంతోషంగా ఉంది' అని అన్నారు.
