పవన్‌ కళ్యాణ్‌, నిధి అగర్వాల్‌ ప్రధాన పాత్రలు పోషిస్తున్న చిత్రం 'హరి హర వీర మల్లు'. క్రిష్‌ జాగర్లమూడి ఈ చిత్రానికి దర్శకత్వం వహిస్తున్నారు. ఎ.ఎం. రత్నం సమర్పణలో మెగా సూర్య ప్రొడక్షన్‌ పతాకంపై భారీ స్థాయిలో తెరకెక్కుతున్న ఈ సినిమాపై దేశవ్యాప్తంగా భారీ అంచనాలు నెలకొన్నాయి. ఈ పాన్‌ ఇండియన్‌ మూవీ తెలుగు, తమిళం, కన్నడ, మలయాళం, హిందీ భాషల్లో విడుదల కానుంది. ఈ ప్రతిష్టాత్మక చిత్రానికి ఇప్పుడు మరో అదనపు ఆకర్షణ తోడైంది.
ప్రముఖ బాలీవుడ్‌ నటుడు బాబీ డియోల్‌ ఈ చారిత్రాత్మక చిత్ర బందంలో అధికారికంగా చేరారు. మొఘల్‌ చక్రవర్తి ఔరంగజేబు పాత్రను ఆయన పోషిస్తున్నారు. ఈ సినిమా చిత్రీకరణలో పాల్గొనడానికి హైదరాబాద్ వచ్చారు. కీలకమైన ఈ షెడ్యూల్‌ కోసం ప్రముఖ ప్రొడక్షన్‌ డిజైనర్‌ తోట తరణి 17వ శతాబ్దానికి చెందిన భారీ దర్బార్‌ సెట్‌ను రూపొందించారు. పవన్‌ కళ్యాణ్‌, బాబీ డియోల్‌ మధ్య వచ్చే కీలక సన్నివేశాలను ఈ దర్బార్‌ సెట్‌లో చిత్రీకరించనున్నారు. బాబీ డియోల్‌కి ఘన స్వాగతం పలుకుతూ ఇత్ర బందం ఓ ప్రత్యేక వీడియోను విడుదల చేసింది. అందులో ఆయన లుక్‌ ఆకట్టుకుంటోంది. ఇటీవల రామోజీ ఫిల్మ్ సిటీలో 40 రోజుల పాటు 900 మంది సిబ్బందితో కీలకమైన యాక్షన్‌ సన్నివేశాలను చిత్రీకరించి మేకర్స్‌ భారీ షెడ్యూల్‌ను ముగించారు. ఈ చిత్రానికి సంబంధించిన మరిన్ని వివరాలు త్వరలో వెలువడనున్నాయి.
