'పెళ్లి చూపులు', 'డియర్‌ కామ్రేడ్‌', 'దొరసాని' వంటి విజయవంతమైన చిత్రాలను నిర్మించిన బిగ్‌ బెన్‌ సినిమాస్‌ సంస్థ తమ 6వ చిత్రానికి 'అన్నపూర్ణ ఫొటో స్టూడియో' అనే టైటిల్‌ని ఖరారు చేశారు. యష్‌ రంగినేని నిర్మిస్తున్న ఈ
చిత్రంలో చైతన్య రావ్‌, లావణ్య హీరో, హీరోయిన్లుగా నటిస్తున్నారు. 'ఓ పిట్ట కథ' ఫేమ్‌ చెందు ముద్దు ఈ చిత్రాన్ని రూపొందిస్తున్నారు.
గ్రామీణ నేపథ్యంగా సాగే క్రైమ్‌ కామెడీ చిత్రమిది. తాజాగా ఈ చిత్ర కాన్సెప్ట్‌ పోస్టర్‌, టైటిల్‌ను దర్శకుడు హరీశ్‌ శంకర్‌ చేతుల మీదుగా ఎనౌన్స్‌ చేశారు. 'అన్నపూర్ణ ఫొటో స్టూడియో' అనే టైటిల్‌, ఇచ్చట అందంగా ఫొటోలు తీయబడును అనే క్యాప్షన్‌ ఆకట్టుకునేలా ఉన్నాయి.
ఈ సందర్భంగా హరీష్‌ శంకర్‌ మాట్లాడుతూ, 'చాలా రోజుల తర్వాత ఓ మంచి టైటిల్‌ చూశాను. అప్పట్లో ప్రతి ఊరిలో ఒక ఫొటో స్టూడియో ఉండేది. ఫొటోస్‌ ప్రింట్‌ అయి వచ్చే వరకు మనం ఎదురుచూసేవాళ్లం. 80 దశకం బ్యాక్‌డ్రాప్‌తో పాటు క్రైమ్‌ కామెడీ జోనర్‌ ఆకట్టుకుంటుందని ఎక్స్‌పెక్ట్‌ చేస్తున్నాను' అని అన్నారు. '80 దశకం నేపథ్యంలో ఒక ఊరిలో సాగే క్రైమ్‌ కామెడీ చిత్రమిది. గతంలో నా 'పిట్ట కథ' సినిమాను ఆదరించినట్లే ఈ సినిమానూ ఇష్టపడతారని ఆశిస్తున్నాను' అని దర్శకుడు చెందు ముద్దు చెప్పారు.
హీరో చైతన్య రావ్‌ మాట్లాడుతూ, 'నాకు పేరు తీసుకొచ్చిన '21 వెడ్స్‌ 30' ప్రమోషన్‌కు హరీష్‌ శంకర్‌ సపోర్ట్‌ చేశారు. ఇప్పుడు ఈ సినిమా టైటిల్‌ని ఎనౌన్స్‌ చేసి బ్లెస్‌ చేశారు. ఈ సినిమా బాగా వస్తోంది. ప్రేక్షకులకు నచ్చుతుందనే నమ్మకం ఉంది' అని అన్నారు.
