సాయి రోనక్‌, అంకిత సాహా, బిస్మి నాస్‌ హీరో, హీరోయిన్లుగా నటించిన సినిమా 'రాజయోగం'. ఈ చిత్రాన్ని శ్రీ నవబాలా క్రియేషన్స్‌, వైష్ణవి నటరాజ్‌ ప్రొడక్షన్స్‌ పతాకాలపై మణి లక్ష్మణ్‌ రావు నిర్మించారు. రామ్‌ గణపతి దర్శకుడు. ఈ సినిమా ఈ నెల 30వ తేదీన గ్రాండ్‌గా విడుదలవుతున్న సందర్భంగా హీరో సాయి రోనక్‌ మీడియాతో చిత్ర విశేషాలను షేర్‌ చేసుకున్నారు. ఆయన మాట్లాడుతూ, 'ఇది ఒక రొమాంటిక్‌ ఎంటర్‌టైనర్‌. రెండు గంటలు నవ్వుకునేలా ఉంటుంది. ఈ చిత్రంలో నేనొక డ్రైవర్‌ క్యారెక్టర్‌ చేశాను. క్లాస్‌ సొసైటీలో కలిసేలా ఉంటానని నన్ను డ్రైవర్‌గా పెట్టుకుంటారు. మా ఓనర్‌ స్థానంలో నేను ఒక అమ్మాయిని కలిసేందుకు పెద్ద హోటల్‌కి వెళ్తాను. నేను కోటీశ్వరుడిని అని
ఆ అమ్మాయి, ఆ అమ్మాయికి డబ్బుందని నేను..ఇలా ఇద్దరం ఒకరి మీద మరొకరం బాగా ఎక్స్‌పెక్టేషన్స్‌ పెట్టుకుంటాం. ఈ డ్రామా చివరకు ఎలా ముగిసింది అనేది ఆసక్తికరంగా ఉంటుంది. పదివేల కోట్ల రూపాయల డైమండ్స్‌ పాయింట్‌ కూడా ఇంట్రెస్టింగ్‌గా ఉంటుంది. ఈవీవీ గారి స్టైల్‌ సినిమాల్లో ఉన్నట్లు
ఒక ఛేజింగ్‌తో సినిమా సాగుతుంది. ఫైట్స్‌, డాన్స్‌ వంటి కమర్షియల్‌ అంశాలతో పాటు రొమాన్స్‌ కూడా ఉంటుంది. నాకు రియలిస్టిక్‌ మూవీస్‌ కంటే 'కేజీఎఫ్‌, ఆర్‌ఆర్‌ఆర్‌' వంటి ఫాంటసీ చిత్రాలు ఇష్టం. నీలకంఠ దర్శకత్వంలో థ్రిల్లర్‌ సినిమాతో పాటు అవికా గోర్‌తో 'పాప్‌ కార్న్‌' అనే మూవీ, ఉషాకిరణ్‌ సంస్థలో ఓ చిత్రంలో నటిస్తున్నాను. ఇవన్నీ నాకు వెర్సటైల్‌ ఆర్టిస్ట్‌గా పేరు తెస్తాయని ఆశిస్తున్నా' అని తెలిపారు.
