హీరో ఆది సాయి కుమార్‌ నటించిన తాజా చిత్రం 'టాప్‌ గేర్‌'. శ్రీధర్‌ రెడ్డి నిర్మాణ సారథ్యంలో తెరకెక్కింది. ఆదిత్య మూవీస్‌ ఎండ్‌ ఎంటర్‌టైన్‌మెంట్స్‌ సమర్పణలో శ్రీ ధనలక్ష్మి ప్రొడక్షన్స్‌ బ్యానర్‌పై రూపొందిన ఈ సినిమాకు కె. శశికాంత్‌ దర్శకత్వం వహించారు. ఈ చిత్రం నేడు (శుక్రవారం) విడుదల కానుంది.
ఈ సందర్భంగా నిర్మాత శ్రీధర్‌ రెడ్డి గురువారం మీడియాతో మాట్లాడుతూ, 'ఈ సినిమా చాలా బాగుంటుంది. ఈ సినిమాతో ఆదికి వచ్చే ఏడాది శుభారంభం కానుంది. ఆది మంచి డ్యాన్సర్‌. మంచి నటుడు. ఈ సినిమాతో వచ్చే ఏడాది ఆయన దశ మారుతుంది. మనం కథ విన్నప్పుడు అది మనల్ని హాంట్‌ చేయాలి. శశికాంత్‌ ఈ కథ చెప్పిన తరువాత నాకు చాలా నచ్చింది. ఈ కథ విన్న తరువాత ఆది అయితే బాగుంటుందని మేం అనుకున్నాం. వెళ్లి కథ చెప్పాం. ఆయన ఓకే అన్నారు.ఈ సినిమాను డైరెక్టర్‌ అద్భుతంగా తీశారు. ఇందులో స్క్రీన్‌ ప్లే హైలెట్‌ అవుతుంది. నెక్ట్స్‌ సీన్‌ ఏంటి? అనే ఆసక్తిని రేకెత్తించేలా సినిమాను తీశారు. ఇలాంటి సినిమాలకు హర్షవర్దన్‌ మ్యూజిక్, ఆర్‌ఆర్‌ ప్లస్ అవుతుంది. కథానుగుణంగా ముందు అనుకున్న బడ్జెట్‌ కన్నా కాస్త పెరిగింది. క్వాలిటీ కోసమే ఖర్చు పెట్టాం. సినిమా చూశాక ఆడియెన్స్‌ కూడా అదే మాట చెబుతారు. కంటెంట్‌ మీద ఉన్న నమ్మకంతోనే సినిమాను తీశాం. క్యాబ్‌ డ్రైవర్‌లకు కస్టమర్లతో కూడా సమస్యలు వస్తుంటాయి. అలా అనుకోకుండా హీరో ఓ సమస్యలో చిక్కకుంటాడు. దాన్నుంచి ఎలా బయటపడతాడు అనేది కథ. తన భార్యను కాపాడు కునేందుకు హీరో చేసే ప్రయత్నాలు బాగుంటాయి. ఈ సినిమాను చూశాక సాయి కుమార్‌ ఈ సినిమా పట్ల ఆయన చాలా హ్యాపీగా ఫీల్‌ అయ్యారు. సినిమా ఫలితంపై మంచి నమ్మకంతో ఉన్నాం' అని చెప్పారు.
