అక్కినేని నాగ చైతన్య, వెంకట్‌ ప్రభు క్రేజీ కాంబినేషన్‌లో రూపొందుతున్న ప్రతిష్టాత్మక తెలుగు-తమిళ ద్విభాషా చిత్రం రెండు నెలల క్రితమే సెట్స్‌ పైకి వెళ్లింది. 'కస్టడీ' ( ఎ వెంకట్‌ ప్రభు హంట్‌' అనేది ట్యాగ్‌లైన్‌) అనే టైటిల్‌తో తెరకెక్కుతున్న ఈ చిత్రంలో కృతిశెట్టి కథానాయికగా నటిస్తోంది. అరవింద్‌ స్వామి విలన్‌ పాత్రలో నటిస్తుండగా, ప్రియమణి పవర్‌ ఫుల్‌ పాత్రలో కనిపించనుంది. సంపత్‌ రాజ్‌, శరత్‌ కుమార్‌, ప్రేమ్‌ జీ, వెన్నెల కిషోర్‌, ప్రేమి విశ్వనాథ్‌ తదితరులు కీలక పాత్రలు పోషిస్తున్నారు.
ఇటివలే ఈ సినిమా గ్రాండ్‌ రిలీజ్‌ డేట్‌ని ప్రకటించారు మేకర్స్‌. ఈ చిత్రం ప్రపంచవ్యాప్తంగా మే 12న విడుదలవుతోంది. గ్రాండ్‌గా న్యూ ఇయర్‌ 2023కి స్వాగతం పలుకుతూ.. ఆదివారం మేకర్స్‌ ఒక స్పెషల్‌ గ్లింప్స్‌ని రిలీజ్‌ చేశారు. ఈ చిత్రానికి సంబంధించిన ఈ మొదటి గ్లింప్స్‌లో ప్రేక్షకులను, నాగ చైతన్య అభిమానులను ఎగ్జైట్‌ చేసే అన్ని అంశాలు ఉన్నాయి.
నాగ చైతన్య కెరీర్‌లో అత్యంత ఖరీదైన చిత్రాల్లో ఇదొకటి. శ్రీనివాస సిల్వర్‌ స్క్రీన్‌ బ్యానర్‌పై శ్రీనివాస చిట్టూరి ఈ చిత్రాన్ని ప్రతిష్టాత్మకంగా నిర్మిస్తున్నారు. ఈ చిత్రానికి సంబంధించిన తారాగణం, అద్భుతమైన సాంకేతిక బృందం ప్రస్తుతం చిత్రీకరణలో బిజీగా ఉన్నారు. అత్యున్నత నిర్మాణ విలువలు, సాంకేతిక ప్రమాణాలతో ఈ సినిమా రూపొందుతోంది. ఈ ప్రతిష్టాత్మక ప్రాజెక్ట్‌ని పవన్‌ కుమార్‌ సమర్పిస్తున్నారు. అబ్బూరి రవి డైలాగ్స్‌ రాస్తుండగా, ఎస్‌ఆర్‌ కత్తిర్‌ సినిమాటోగ్రఫీ అందిస్తున్నారు.
