ఎన్టీఆర్‌, కొరటాల శివ దర్శకత్వంలో ఓ సినిమా రూపొందుతున్న సంగతి తెలిసిందే. నందమూరి కళ్యాణ్‌ రామ్‌ సమర్పణలో ఎన్టీఆర్‌ ఆర్ట్స్‌, యువ సుధ ఆర్ట్స్‌ బ్యానర్స్‌పై కొసరాజు హరికృష్ణ, సుధాకర్‌ మిక్కిలినేని ఈ చిత్రాన్ని నిర్మిస్తున్నారు. ఎన్టీఆర్‌ హీరోగా నటిస్తోన్న 30వ సినిమా ఇది. ప్రస్తుతం ఈ చిత్రానికి సంబంధించి ప్రీ ప్రొడక్షన్‌ పనులు శరవేగంగా జరుగుతున్నాయి. ఫిబ్రవరి నుంచి రెగ్యులర్‌ షూటింగ్‌ ప్రారంభం అవుతుందని చిత్ర యూనిట్‌ తెలిపింది.
న్యూ ఇయర్‌ రోజున ఇటు ఫ్యాన్స్‌కి, అటు ఆడియెన్స్‌కి కిక్‌ ఇచ్చేలా దర్శక, నిర్మాతలు ఓ ప్రకటన విడుదల చేశారు. ఏప్రిల్‌5, 2024లో ఈ చిత్రాన్ని విడుదల చేస్తున్నట్లు ప్రకటించారు. పోస్టర్‌ను గమనిస్తే.. అందులో కత్తులు పట్టుకున్న తారక్‌ చేతులు మాత్రం కనిపిస్తున్నాయి. 'వెన్‌ కరేజ్‌ టర్న్స్‌ ఏ డిసీజ్‌.. ఫియర్‌ ఈజ్‌ ది ఓన్లీ క్యూర్‌' అంటూ క్యాప్షన్‌ కూడా పోస్టర్‌లో ఉంది. పాన్‌ ఇండియా మూవీగా ఈ చిత్రాన్ని తెలుగు, హిందీ, కన్నడ, తమిళ, మలయాళ భాషల్లో విడుదల చేయటానికి సన్నాహాలు జరుగుతున్నాయి. సినీ ఇండిస్టీలో టాప్‌ టెక్నీషియన్స్‌గా పేరున్న సినిమాటోగ్రాఫర్‌ రత్నవేలు, ప్రొడక్షన్‌ డిజైనర్‌ సాబు సిరిల్‌, ఎడిటర్‌ శ్రీకర ప్రసాద్‌ ఈ చిత్రానికి వర్క్‌ చేస్తున్నారు. ప్రముఖ సంగీత దర్శకుడు అనిరుథ్‌ ఈ చిత్రాకి సంగీత సారథ్యం వహించనున్నారు.