విజయ్‌, వంశీ పైడిపల్లి కాంబినేషన్‌లో రూపొందుతున్న భారీ చిత్రం 'వారసుడు' (తమిళంలో వారిసు). సంక్రాంతి కానుకగా జనవరి 12న గ్రాండ్‌ రిలీజ్‌ అవుతుంది. విజయ్‌ సరసన రష్మిక మందన్న కథానాయిక నటిస్తోన్న ఈ చిత్రాన్ని శ్రీ వేంకటేశ్వర క్రియేషన్స్‌, పివిపి సినిమా పతాకాలపై నిర్మాతలు దిల్‌ రాజు, శిరీష్‌, పరమ్‌ వి పొట్లూరి, పెరల్‌ వి పొట్లూరి ప్రతిష్టాత్మకంగా నిర్మిస్తున్నారు.
ఈ చిత్రంలో హీరో శ్రీకాంత్‌ కీలక పాత్ర పోషించారు. ఈ సందర్భంగా ఆయన ఈ చిత్ర విశేషాలను మీడియాతో పంచుకున్నారు.
నా తొలి తమిళ సినిమా
నా కెరీర్‌లో తమిళ సినిమా చేయడం ఇదే తొలిసారి. ఇందులో విజయ్‌కి బ్రదర్‌గా కనిపిస్తా. చాలా కీలకమైన పాత్ర ఇది. ఇదొక అవుట్‌ అండ్‌ అవుట్‌ ఫ్యామిలీ ఎంటర్‌టైనర్‌. అద్భుతమైన హ్యుమన్‌ ఎమోషన్స్‌ ఉంటాయి. సినిమాలో విజువల్స్‌ అద్భుతంగా ఉంటాయి. తెలుగు, తమిళ భాషల్లో చేసినప్పటికీ రష్మిక, జయసుధ, నేను, కిక్‌ శ్యామ్‌, శరత్‌ కుమార్‌, సంగీత, ప్రభు.. ఇలా అందరం ఉండటంతో ఇది పూర్తి తెలుగు నేటివిటీ ఉన్న సినిమాలానే ఉంటుంది. సంక్రాంతి అంటేనే సినిమాల పండగ. అన్ని సినిమాలని ప్రేక్షకులు ఆదరిస్తారు. ఇది ఫ్యామిలీ ఎంటర్‌టైనర్‌. పండక్కి పండగ లాంటి సినిమా.
అన్నదమ్ముల ఎమోషన్స్‌ అద్భుతం
బ్రదర్స్‌ మధ్య జరిగే ఎమోషన్స్‌ ఇందులో ఉంటాయి. బ్రదర్స్‌ మధ్య ఎలాంటి పరిస్థితులు ఉంటాయో .. అన్నీ చక్కగా ఒక మంచి ఫ్యామిలీ ఎంటర్‌ టైనర్‌లా ఉంటుంది. వంశీ పైడిపల్లి సినిమాల్లో గ్రేట్‌ ఎమోషన్స్‌ ఉంటాయి. ఈ మధ్య కాలంలో విజయ్‌ కూడా ఫ్యామిలీ ఎంటర్‌టైనర్స్‌ చేయలేదు. ఇందులో నా పాత్ర మొదటి నుండి చివరి వరకూ వుంటుంది. విజరు లాంటి స్టార్‌ సినిమాతో తమిళంలో అడుగుపెట్టినందుకు చాలా ఆనందంగా ఉంది.
మంచి ఫ్యామిలీ ఎంటర్‌టైనర్‌
విజయ్‌తో కలిసి పని చేయడం ఇదే తొలిసారి. ఆయన చాలా సైలెంట్‌గా ఉంటారు. ఎక్కువగా మాట్లాడరు. క్యార్వాన్‌ వాడరు. సెల్‌ ఫోన్‌ దగ్గర ఉండదు. ఒకసారి సెట్‌లో అడుగు పెడితే ప్యాకప్‌ చెప్పినంతవరకూ అక్కడ నుండి కదలరు. చాలా అంకితభావంతో పని చేస్తారు. ఇక వంశీ పైడిపల్లి చాలా క్లారిటీ ఉన్న దర్శకుడు. ఇక తమన్‌ మ్యూజిక్ గురించి చెప్పాలంటే, ఇప్పటికే రంజితమే, అమ్మ పాట, శింబు పాడిన పాటలు బ్లాక్‌ బస్టర్‌ అయ్యాయి. రీరికార్డింగ్‌ అద్భుతంగా చేశాడు. ఇన్నాళ్ళు ఇండిస్టీలో ఉన్నప్పటికీ దిల్‌ రాజు ప్రొడక్షన్‌లో చేయడం ఇదే తొలిసారి. అలాగే శంకర్‌గారి సినిమాలో కూడా చాలా డిఫరెంట్‌ క్యారెక్టర్‌ చేస్తున్నాను.
