'ఊహలు గుసగుసలాడే', 'జ్యో అచ్యుతానంద' వంటి సూపర్‌ హిట్‌ సినిమాల తర్వాత నాగ శౌర్య, దర్శకుడు శ్రీనివాస్‌ అవసరాల కలయికలో వస్తున్న హ్యాట్రిక్‌ మూవీ 'ఫలానా అబ్బాయి ఫలానా అమ్మాయి'.
పీపుల్‌ మీడియా ఫ్యాక్టరీ, దాసరి ప్రొడక్షన్స్‌ సంయుక్తంగా నిర్మిస్తున్న ఈ ఫీల్‌ గుడ్‌ రొమాంటిక్‌ ఫిల్మ్‌లో మాళవిక నాయర్‌ హీరోయిన్‌గా నటిస్తోంది. టీజీ విశ్వ ప్రసాద్‌, పద్మజ దాసరి నిర్మాతలుగా వ్యవహరిస్తున్న
ఈ చిత్రానికి వివేక్‌ కూచిభొట్ల సహా నిర్మాత.
ఈనెల 17న ఈ చిత్రం థియేటర్లలో భారీస్థాయిలో విడుదల కానుంది. ఈ చిత్రం నుంచి ఇప్పటికే విడుదలైన 'కనుల చాటు మేఘమా' పాట, టైటిల్‌ సాంగ్‌ విశేషంగా ఆకట్టుకున్నాయి. తాజాగా ఈ చిత్రం నుంచి మూడో పాట విడుదలైంది.
గురువారం సాయంత్రం మేకర్స్‌ విడుదల చేసిన 'నీతో ఈ గడిచిన కాలం' అనే పాట 'కనుల చాటు మేఘమా', 'ఫలానా అబ్బాయి ఫలానా అమ్మాయి' టైటిల్‌ సాంగ్‌ తరహాలోనే వినసొంపుగా, వినగానే నచ్చేలా ఉంది. 'ఊహలు గుసగుసలాడే', 'జ్యో అచ్యుతానంద' చిత్రాలలోని మెలోడీ పాటలు ఎంతలా ఆకట్టుకున్నాయో.. ఈ చిత్రం నుంచి విడుదలవుతున్న ఒక్కో పాట అంతకుమించి అనేలా ఉన్నాయి. మెలోడీలను స్వరపరచడంలో కళ్యాణి మాలిక్‌ది ప్రత్యేక శైలి అని ఈ పాటతో మరోసారి రుజువు చేసుకున్నారు. ఈ పాటకు భాస్కర భట్ల రవికుమార్‌ అద్భుతమైన సాహిత్యం అందించారు.
'నీతో ఈ గడిచిన కాలం.. నడిచిన దూరం ఎంతో ఇష్టం చెవిలో చెప్పే కబురులు అన్నీ ఇష్టం ఇష్టం ఇష్టం'' అంటూ సాగిన పాటలోని ప్రతి వాక్యం ఆకట్టుకుంటోంది. గాయని గీతామాధురితో కలిసి కళ్యాణి మాలిక్‌ ఈ పాటను ఎంతో అందంగా ఆలపించారు. పాటలోని వాక్యాల మాదిరిగానే ఈ పాట వెన్నెల్లో గోదారిలా ఉంది. నాయకా నాయికలకు ఒకరిపై ఒకరికున్న ఇష్టాన్ని, ప్రేమని తెలిపేలా సాగిన ఈ సాంగ్‌ లిరికల్‌ వీడియో ఎంతగానో ఆకట్టుకుంటోంది. హీరో, హీరోయిన్ల కెమిస్ట్రీ, విజువల్స్‌ కట్టిపడేస్తున్నాయి. పాట ఎంత అందంగా ఉందో.. లిరికల్‌ వీడియోలోని ప్రతి ఫ్రేమ్‌ అంత అందంగా ఉన్నాయి. ఈ పాటకు రఘు మాస్టర్‌ కొరియోగ్రఫీ చేశారు.
- మేకర్స్‌
