- అండగా ఉప్పల ట్రస్ట్‌
- సర్పంచ్‌ పయ్యావుల రమేష్‌ యాదవ్‌
నవతెలంగాణ-ఆమనగల్‌
             నిరుపేద కుటుంబాలకు అండగా ఉప్పల చారిటబుల్‌ ట్రస్ట్‌ నిలుస్తుందని వెంకటాపూర్‌ సర్పంచ్‌ పయ్యావుల రమేష్‌యాదవ్‌ అన్నారు. శుక్రవారం ఉప్పల ట్రస్ట్‌ ఆధ్వర్యంలో నిర్మిస్తున్న ఇండ్ల లబ్దిదారుల్లో ఒకరైన సొప్పరి శ్రీను ఇంటి నిర్మాణానికి కావాల్సిన స్టీల్‌ సిమెంట్‌ ఇసుక తదితర వాటిని స్థానిక సర్పంచ్‌తో కలిసి ఉప్పల ట్రస్ట్‌ సభ్యులు సమకూర్చారు. ఈ సందర్భంగా సర్పంచ్‌ రమేష్‌ యాదవ్‌ మాట్లాడుతూ తలకొండపల్లి జడ్పీటీసీ ఉప్పల వెంకటేష్‌ స్థాపించిన ఉప్పల చారిటబుల్‌ ట్రస్ట్‌ చేపడుతున్న కార్యక్రమాలు నిరుపేద కుటుంబాల పాలిట వరంగా మారాయని అన్నారు. అందులో భాగంగా గ్రామంలో 22 మంది నిరుపేద కుటుంబాల ఇండ్ల నిర్మాణాలకు కావాల్సిన సహకారాన్ని ఉప్పల ట్రస్ట్‌ ద్వారా అందిస్తున్నట్టు ఆయన పేర్కొన్నారు. అదేవిధంగా మండలంలోని సంగాయిపల్లి గ్రామంలో 33 ఇండ్లు నిర్మిస్తుండగా శుక్రవారం గండిగల్ల సుధాకర్‌ ఇంటి నిర్మాణానికి కావాల్సిన సిమెంట్‌ ఇసుక తదితర వాటిని సమకూర్చినట్టు ట్రస్ట్‌ సభ్యులు తెలిపారు. ఈ కార్యక్రమంలో ఎంపీటీసీ సభ్యులు సునీత సుదర్శన్‌రెడ్డి, కో-ఆప్షన్‌ సభ్యుడు ఇమ్రాన్‌, నాయకులు నర్సింహ, కేశవులు, శ్రీను, రాములు, బాలయ్య తదితరులు పాల్గొన్నారు.