నవతెలంగాణ-శంషాబాద్‌
గుర్తు తెలియని వాహనం ఢీకొని వ్యక్తి మృతి చెందాడు.ఈ ఘటన శంషాబాద్‌ పోలీస్‌ స్టేషన్‌ పరిధిలో బుధవారం జరిగింది. సర్కిల్‌ ఇన్‌స్పెక్టర్‌ ఎ. శ్రీధర్‌ కుమార్‌ తెలిపిన వివరాల ప్రకారం మహ బూబ్‌ నగర్ జిల్లా మూసాపేట్‌ మండలం తాళ్లగడ్డ గ్రామానికి చెందిన బుజగోని యాదయ్య గౌడ్‌ (49) రాజేంద్రనగర్‌ మండలంలోని కిస్మత్‌పూర్‌ గ్రామంలో నివాసం ఉంటూ , నాలుగేండ్లుగా మాసన్‌ పని చేసుకొని జీవిస్తున్నాడు. ఇతనికి ఈనెల 13 న మృతుని బ్రదర్‌ వాళ్ల ఊర్లో బంధువు చనిపోయారని సమాచారం రావడంతో అంత్యక్రియల కోసమని సొంత ఊరుకు వెళ్లడానికి శంషాబాద్‌ మండల పరిధిలోని తొండుపల్లి దగ్గరకు వచ్చాడు. తొండుపల్లి యూటర్న్‌ వద్ద మధ్యకు రాగానే రాత్రి 12:20 గంటలకు రోడ్డు దాటుతుండగా వేగంగా దూసుకు వచ్చిన గుర్తు తెలియని వాహనం ఢీకొని తీవ్ర గాయాలై అక్కడికక్కడే మృతి చెందాడు. విషయం తెలుసుకున్న పోలీసులు ఘటనా స్థలానికి చేరుకుని మృతదేహాన్ని పోస్టుమార్టం నిమిత్తం ఉస్మానియా ఆస్పత్రికి తరలించారు. పోలీసులు కేసు నమోదు చేసుకుని దర్యాప్తు చేస్తున్నారు.
