- బాసరకు 88, వర్గల్‌కు 20 బస్సుల ఏర్పాటు
నవతెలంగాణ-హైదరాబాద్‌బ్యూరో
           వసంత పంచమి సందర్భంగా యాత్రీకుల కోసం 108 ప్రత్యేక బస్సులను తెలంగాణ రాష్ట్ర రోడ్డు రవాణా సంస్థ(టీఎస్‌ఆర్టీసీ) ఏర్పాటు చేసింది. నిర్మల్‌ జిల్లాలోని ప్రసిద్ధ పుణ్యక్షేత్రం బాసరకు 88 బస్సులు, సిద్దిపేట జిల్లాలోని వర్గల్‌కు 20 ప్రత్యేక బస్సులను నడపనుంది. బుధ, గురువారాల్లో ఈ బస్సులు తిరుగుతాయి. హైదరాబాద్‌ ఎంజీబీఎస్‌ నుంచి బాసరకు 21, జేబీఎస్‌ నుంచి 12, నిజామాబాద్‌ నుంచి 45, హన్మకొండ నుంచి 5, కరీంనగర్‌ నుంచి 4, జగిత్యాల నుంచి ఒక బస్సును ఏర్పాటు చేశారు. వర్గల్‌కు సికింద్రాబాద్‌(గురుద్వారా) నుంచి ప్రతి అరగంటకో బస్సు నడిచే విధంగా టీఎస్‌ఆర్టీసీ అధికారులు ఏర్పాట్లు చేశారు. సికింద్రాబాద్‌ గురుద్వారా నుంచి 10, జేబీఎస్‌ నుంచి 6, గజ్వేల్‌, సిద్దిపేట రెండేసి బస్సులను నడుపుతున్నారు. ఈ నెల 26న వసంత పంచమి సందర్భంగా ఈ ఏర్పాట్లు చేసినట్టు టీఎస్‌ఆర్టీసీ చైర్మెన్‌, బాజిరెడ్డి గోవర్దన్‌, మేనేజింగ్‌ డైరెక్టర్‌ వీసీ సజ్జనర్‌ తెలిపారు. ప్రజలు ఈ అవకాశాలను వినియోగించుకోవాలని విజ్ఞప్తి చేశారు. ముందస్తు రిజర్వేషన్‌ సౌకర్యం కూడా ఉందనీ, దానికోసం టీఎస్‌ఆర్టీసీ అధికారిక వెబ్‌సైట్‌లో ఇతర వివరాలు చూడొచ్చని తెలిపారు.