నవతెలంగాణ-హైదరాబాద్‌బ్యూరో
మరాఠా వీరుడు ఛత్రపతి శివాజీ 13వ వారసుడు, మాజీ ఎంపీ ఛత్రపతి శంభాజీ రాజే గురువారం ప్రగతిభవన్‌లో ముఖ్యమంత్రి కే చంద్రశేఖర్‌రావును కలిశారు. ఈ సందర్భంగా సీఎం కేసీఆర్‌ ఆయన్ని శాలువాతో సత్కరించి, పుష్పగుచ్చంతో స్వాగతం పలికారు. మధ్యాహ్నం కలిసి భోజనం చేశారు. పలు అంశాలపై వారు చర్చలు జరిపారు. ఈ సందర్భంగా రాష్ట్రంలో అమలవుతున్న సంక్షేమ పథకాల గురించి శంభాజీరాజే సీఎం కేసీఆర్‌ను అడిగి తెలుసుకున్నారు. అనంతరం 'రాజర్షి సాహు ఛత్రపతి' పుస్తకాన్ని శంభాజీ రాజే సీఎం కేసీఆర్‌కు అందించారు. రోడ్లు భవనాల శాఖ మంత్రి వేముల ప్రశాంత్‌ రెడ్డి, చామకూర మల్లారెడ్డి, ఎమ్మెల్సీలు కవిత, మధుసూధనాచారి, పల్లా రాజేశ్వర్‌రెడ్డితో పాటు ఛత్రపతి శంభాజీ రాజేతో వచ్చిన ప్రతినిధులు ఈ సమావేశంలో పాల్గొన్నారు. ఇది కేవలం మర్యాదపూర్వక కలయికే అని ప్రగతిభవన్‌ వర్గాలు తెలిపాయి.
