- రికార్డు స్థాయిలో 8.47 లక్షల దరఖాస్తులు
నవతెలంగాణ బ్యూరో - హైదరాబాద్‌
రాష్ట్రంలో గ్రూప్‌-4 పోస్టులకు సంబంధించి దరఖాస్తుల గడువును వచ్చేనెల మూడో తేదీ వరకు తెలంగాణ రాష్ట్ర పబ్లిక్‌ సర్వీస్‌ కమిషన్‌ (టీఎస్‌పీఎస్సీ) పొడిగించింది. షెడ్యూల్‌ ప్రకారం దరఖాస్తు గడువు సోమవారం సాయంత్రం ఐదు గంటలతో ముగియనున్న విషయం తెలిసిందే. అభ్యర్థుల విజ్ఞప్తి మేరకు వచ్చేనెల మూడో తేదీ సాయంత్రం ఐదు గంటల వరకు పొడిగించామని టీఎస్‌పీఎస్సీ కార్యదర్శి అనితా రామచంద్రన్‌ ఒక ప్రకటనలో తెలిపారు. ఇప్పటి వరకు రికార్డుస్థాయిలో 8,47,277 దరఖాస్తులు వచ్చాయని వివరించారు. సోమవారం 34,247, ఆదివారం 49,893 దరఖాస్తులను అభ్యర్థులు సమర్పించారని పేర్కొన్నారు. 8,180 గ్రూప్‌-4 పోస్టుల భర్తీకి గతనెల 30న నోటిఫికేషన్‌ను టీఎస్‌పీఎస్సీ విడుదల చేసిన విషయం విదితమే. ఇతర వివరాలకు https://www.tspsc.gov.in వెబ్‌సైట్‌ను సంప్రదించాలని సూచించారు.