నవతెలంగాణ బ్యూరో - హైదరాబాద్‌
రాష్ట్రంలో వివిధ నోటిఫికేషన్ల రాతపరీక్షల నిర్వహణ తేదీలను తెలంగాణ రాష్ట్ర పబ్లిక్‌ సర్వీస్‌ కమిషన్‌ (టీఎస్‌పీఎస్సీ) ఖరారు చేసింది. ఈ మేరకు టీఎస్‌పీఎస్సీ కార్యదర్శి అనితా రామచంద్రన్‌ సోమవారం ఒక ప్రకటన విడుదల చేశారు. 148 అగ్రికల్చర్‌ ఆఫీసర్‌ పోస్టుల భర్తీ కోసం కంప్యూటర్‌ ఆధారిత నియామక పరీక్ష (సీబీఆర్‌టీ) విధానంలో ఏప్రిల్‌ 25న పరీక్షను నిర్వహిస్తామని తెలిపారు. 18 డ్రగ్స్‌ ఇన్‌స్పెక్టర్‌ పోస్టుల భర్తీ కోసం సీబీఆర్‌ విధానంలో మే ఏడో తేదీన పరీక్ష జరుగుతుందని పేర్కొన్నారు. 247 ప్రభుత్వ పాలిటెక్నిక్‌ లెక్చరర్ల నియామకం కోసం ఓఎంఆర్‌ విధానంలో మే 13న రాతపరీక్ష ఉంటుందని వివరించారు. 128 ఫిజికల్‌ డైరెక్టర్‌ పోస్టుల భర్తీ కోసం సీబీఆర్‌టీ విధానంలో మే 17న పరీక్ష ఉంటుందని తెలిపారు. 71 లైబ్రరియన్‌ పోస్టుల భర్తీ కోసం మే 17న పరీక్షను నిర్వహిస్తామని పేర్కొన్నారు. ఆయా పోస్టులకు దరఖాస్తు చేసిన అభ్యర్థులు పరీక్షలకు హాజరుకావాలని సూచించారు. పూర్తి వివరాలకు https://www.tspsc.gov.in వెబ్‌సైట్‌ను సంప్రదించాలని సూచించారు.