అణిముత్యాల్లాంటి సినిమాలతో తెలుగు సినిమాను విశ్వవ్యాప్తంగా చాటిన దిగ్దర్శకుడు కళాతపస్వి కె.విశ్వనాథ్‌ అంత్యక్రియలు శుక్రవారం ముగిశాయి. హైదరాబాద్‌లోని పంజాగుట్ట శ్మశానవాటికలో కుటుంబసభ్యులు, అభిమానులు, సినీ ప్రముఖుల సమక్షంలో అంతిమ సంస్కారాలు నిర్వహించారు. అంతకుముందు ఫిలిం ఛాంబర్‌లో ఆయన పార్థీవదేహానికి అభిమానులు, సినీ, రాజకీయ ప్రముఖులు ఘనంగా నివాళులర్పించారు. మూసధోరణిలో కొట్టుకుపోతున్న తెలుగు సినిమా కథల గమనాన్ని మార్చిన లెజెండరీ దర్శకుడు విశ్వనాథ్‌తో తమకున్న అనుబంధాన్ని గుర్తు చేసుకుని పలువురు సినీ ప్రముఖులు తీవ్ర భావోద్వేగానికి గురయ్యారు. అంతిమయాత్రలో అభిమానులు సైతం పెద్ద సంఖ్యలో పాల్గొని కళాతపస్వికి తుది వీడ్కోలు పలికారు. గత కొంతకాలంగా వృద్ధాప్య సమస్యలతో బాధపడుతున్న ఆయన గురువారం రాత్రి మృతి చెందారు.దీంతో ఐదు దశాబ్దాల పాటు తెలుగు తెరపై తనదైన ముద్ర వేసిన కళాతపస్వి ఇక లేరన్న వార్తతో తెలుగు చిత్రసీమను శోకసంద్రంలో మునిగిపోయింది.
