నవతెలంగాణ - ప్రత్యేక ప్రతినిధి
కానిస్టేబుల్‌ డ్రైవర్‌, మెకానిక్‌ పోస్టులకు తుది పరీక్షలు మార్చి 2వ తేదీ నుంచి మొదలవుతాయని పోలీసు రిక్రూట్‌మెంట్‌ బోర్డు చైర్మెన్‌ వీవీ శ్రీనివాసరావు గురువారం తెలిపారు. మార్చి 2 నుంచి 21వ తేదీ వరకు ఈ పరీక్షలు అంబర్‌పేట్‌లోని సీపీఎల్‌ పోలీసు గ్రౌండ్స్‌లో జరుగుతాయని ఆయన తెలిపారు. ఇప్పటికే ఈ పోస్టులకు జరిగిన పీఎంటీ, పీఈటీ పరీక్షలో నెగ్గిన అభ్యర్థులు తుది పరీక్షకు అర్హులని తెలిపారు. సంబంధిత అభ్యర్థులు తమ అధికారిక వెబ్‌ సైట్‌లో 25వ తేదీ శనివారం నుంచి 28వతేదీ మంగళవారం వరకు తమ అడ్మిట్‌ కార్డులను డౌన్‌లోడ్‌ చేసుకోవాలని కోరారు. పరీక్షకు హాజరయ్యే అభ్యర్థులు అందుకు సంబంధించిన సర్టిఫికేట్‌లను కూడా వెంట తీసుకు రావాలనీ, ఒక రోజు ముందే పరీక్ష జరిగే కేంద్రాన్ని చూసుకుని అడ్మిట్‌ కార్డులో సూచించిన పరీక్ష తేదీన నిర్ణీత సమయానికి చేరుకోవాలని ఆయన సూచించారు.
