- పరీక్షకు వారం ముందు నుంచి హాల్‌టికెెట్లు డౌన్‌లోడ్‌ : టీఎస్‌పీఎస్సీ
నవతెలంగాణ బ్యూరో - హైదరాబాద్‌
          రాష్ట్రంలో గ్రూప్‌-2 రాతపరీక్షల తేదీలను తెలంగాణ రాష్ట్ర పబ్లిక్‌ సర్వీస్‌ కమిషన్‌ (టీఎస్‌పీఎస్సీ) ఖరారు చేసింది. ఆగస్టు 29,30 తేదీల్లో గ్రూప్‌-2 పరీక్షలను నిర్వహిస్తున్నట్టు టీఎస్‌పీఎస్సీ కార్యదర్శి అనితా రామచంద్రన్‌ మంగళవారం ఒక ప్రకటనలో తెలిపారు. పరీక్ష నిర్వహణకు వారం రోజుల ముందు నుంచి హాల్‌టికెట్లు డౌన్‌లోడ్‌ చేసుకునేందుకు అవకాశముంటుందని పేర్కొన్నారు. రాష్ట్రంలో 18 శాఖల్లో 783 పోస్టుల భర్తీకి గతేడాది డిసెంబర్‌ 29న టీఎస్‌పీఎస్సీ ప్రకటించిన గ్రూప్‌-2 నోటిఫికేషన్‌ను విడుదల చేసిన విషయం తెలిసిందే. రాష్ట్ర వ్యాప్తంగా 5,51,943 దరఖాస్తులొచ్చాయని అధికారులు వివరించారు. అంటే ఒక్కో పోస్టుకు 705 మంది అభ్యర్థులు పోటీపడుతున్నారు. గ్రూప్‌-1 మెయిన్స్‌ రాతపరీక్షలు జూన్‌ ఐదు నుంచి జరుగుతాయి. జులై ఒకటో తేదీన గ్రూప్‌-4 పరీక్షలుంటాయి. గ్రూప్‌-3 రాతపరీక్షల తేదీలను త్వరలోనే ప్రకటించే అవకాశమున్నది. ఇతర వివరాలకు https://www.tspsc.gov.in వెబ్‌సైట్‌ను సంప్రదించాలని అధికారులు సూచించారు.