- నోటిఫికేషన్‌ విడుదల
నవతెలంగాణ బ్యూరో - హైదరాబాద్
రాష్ట్రంలో ఎంబీఏ, ఎంసీఏ కోర్సుల్లో 2023-24 విద్యాసంవత్సరంలో ప్రవేశాలకు నిర్వహించే ఐసెట్‌ నోటిఫికేషన్‌ను ఉన్నత విద్యామండలి చైర్మెన్‌ ఆర్‌ లింబాద్రి మంగళవారం విడుదల చేశారు. ఈనెల ఆరో తేదీ నుంచి ఆన్‌ లైన్‌లో ఐసెట్‌ దరఖాస్తుల స్వీకరణ ప్రక్రియ ప్రారంభమవుతుందని తెలిపారు. ఆలస్య రుసుం లేకుండా వాటి సమర్పణకు మే ఆరో తేదీ వరకు ఉందని పేర్కొన్నారు. ఎస్సీ,ఎస్టీ,వికలాంగులు రూ.550, ఇతరులు రూ.750 దరఖాస్తు ఫీజు చెల్లించాలని సూచించారు. ఆలస్య రుసుం రూ.250తో మే 12 వరకు, రూ.500తో 18 వరకు దరఖాస్తు చేసేందుకు అవకాశముందని తెలిపారు. అదేనెల 22 నుంచి హాల్‌టికెట్లను డౌన్‌లోడ్‌ చేసుకోవచ్చని సూచించారు. మే 26,27 తేదీల్లో రాతపరీక్షలు ఆన్‌లైన్‌లో నిర్వహిస్తామని పేర్కొన్నారు. జూన్‌ ఐదో తేదీన ప్రాథమిక కీని అదేనెల 20న ఫలితాలు ప్రకటిస్తామని వివరించారు. ఇతర వివరాలకు https://icet.tsche.ac.in వెబ్‌సైట్‌ను సంప్రదించాలని సూచించారు. ఈ కార్యక్రమంలో కేయూ వీసీ తాటికొండ రమేష్‌, రిజిస్ట్రార్‌ టి శ్రీనివాసరావు, ఐసెట్‌ కన్వీనర్‌ పి వరలక్ష్మి పాల్గొన్నారు.
