- కాళ్లకు ట్యాగ్లు, రెక్కలకు స్టాంపు
- భయపడాల్సిన అవసరం లేదన్న ఎస్‌ఐ
నవతెలంగాణ-ఎర్రుపాలెం
           ఓ పావురం ఖమ్మం జిల్లాలో కలకలం సృష్టించింది. కాళ్లకు ట్యాగ్లు, రెక్కలకు స్టాంపు ఉండటంతో స్థానికులు భయాందోళనకు గురయ్యారు. ఎస్‌ఐ సురేష్‌ తెలిపిన వివరాల ప్రకారం.. స్థానికులు ఇచ్చిన సమాచారంతో ఖమ్మం జిల్లా ఎర్రుపాలెం మండలం మామునూరు గ్రామంలో కాళ్లకు ట్యాగులు ఉన్న ఓ పావురాన్ని పోలీసులు గుర్తించి పట్టుకున్నారు. దాని రెక్కల పైన డెల్టా 1000 కేఎం అని స్టాంపు ముద్రించగా, కాళ్లకు వేసిన ట్యాగ్‌లు ఒక కాలికి 999 టీఎన్‌ అని, మరొక కాలుకి 1417 అని ఉన్నట్టు తెలిపారు. విచారించగా .. తమిళనాడులోని తంజావూరులో ఓ సంస్థకు చెందిన ఆర్గనైజర్లు పావురాల పోటీలు నిర్వహిస్తారని, ఆ పోటీల్లో పాల్గొన్న ఈ పావురం ఆకాశంలో విహరించి తిరిగి తన గమ్య స్థానానికి వెళ్లాల్సి ఉండగా దారి తప్పి తెలంగాణలోకి ప్రవేశించిందని తెలిపారు. తిరిగి తిరిగి అలిసిపోయి గ్రామంలో వాలడంతో ప్రజలు భయభ్రాంతులకు గురయ్యారన్నారు. ప్రజలు దాన్ని చూసి ఆందోళన చెందాల్సిన అవసరం లేదని స్పష్టంచేశారు.