నవతెలంగాణ-ప్రత్యేక ప్రతినిధి : పోలీసు రవాణా సంస్థ (పీటీఓ)లోని ఎస్‌ఐ పోస్టులకు ఈనెల 26న తుది రాత పరీక్ష నిర్వహిస్తున్నట్టు పోలీసు రాష్ట్ర పోలీసు రిక్రూట్‌మెంట్‌ బోర్డు చైర్మెన్‌ వి.వి శ్రీనివాస్‌రావు ఆదివారం తెలిపారు. ఆ రోజు ఉదయం 10 గంటల నుంచి మధ్యాహ్నం 1 గంటల వరకు అభ్యర్థులకు టెక్నికల్‌ పేపర్‌ పరీక్ష ఉంటుందని ఆయన చెప్పారు. అంతేగాక, ఇదే పోస్టులకు సంబంధించి మరో రెండు పరీక్షలకు తేదీలను త్వరలోనే ప్రకటిస్తామని, దానికి సంబంధించిన హాల్‌ టికెట్లను కూడా వేరుగా జారీ చేస్తామని ఆయన తెలిపారు. అయితే, 26న నిర్వహించబోయే రాత పరీక్షకు సంబంధించిన అభ్యర్థులు తమ హాల్‌ టికెట్లను ఈనెల 21 నుంచి 24వ తేదీ వరకు తమ అధికారిక వెబ్‌సైట్‌ నుంచి డౌన్‌లోడ్‌ చేసుకోవాలని ఆయన అభ్యర్థులకు సూచించారు.డౌన్‌లోడ్‌ చేసుకున్న హాల్‌ టికెట్లపై అభ్యర్థులు తమ పాస్‌పోర్ట్‌సైజ్‌ ఫోటోలను అతికించాలని ఆయన తెలిపారు. పరీక్షా కేంద్రాలు హైదరాబాద్‌తో పాటు చుట్టుపక్కల ప్రాంతాల్లో ఉంటాయని చెప్పారు.