- జూన్‌ 17న నిర్వహణ : టీఎస్‌పీఎస్సీ
నవతెలంగాణ బ్యూరో - హైదరాబాద్‌
            రాష్ట్రంలో హార్టికల్చర్‌ ఆఫీసర్‌ పోస్టుల భర్తీకి వచ్చేనెల నాలుగో తేదీన నిర్వహించాల్సిన రాతపరీక్షను వాయిదా వేస్తున్నట్టు తెలంగాణ రాష్ట్ర పబ్లిక్‌ సర్వీస్‌ కమిషన్‌ (టీఎస్‌పీఎస్సీ) ప్రకటించింది. 22 హార్టికల్చర్‌ ఆఫీసర్‌ పోస్టుల భర్తీకి గతేడాది డిసెంబర్‌ 22న టీఎస్‌పీఎస్సీ నోటిఫికేషన్‌ను విడుదల చేసిన సంగతి తెలిసిందే. ఈ పరీక్షను తిరిగి జూన్‌ 17న నిర్వహించనున్నట్టు టీఎస్‌పీఎస్సీ కార్యదర్శి అనితా రామచంద్రన్‌ మంగళవారం ఒక ప్రకటనలో పేర్కొన్నారు. ప్రశ్నాపత్రాల లీకేజీ నేపథ్యంలో ఇప్పటికే నాలుగు పరీక్షలను రద్దు చేసిన విషయం విదితమే. రెండింటిని వాయిదా వేసింది. గ్రూప్‌-1 ప్రిలిమినరీతోపాటు డివిజనల్‌ అకౌంట్స్‌ ఆఫీసర్‌ (డీఏవో), అసిస్టెంట్‌ ఎగ్జిక్యూటివ్‌ ఇంజినీర్‌ (ఏఈఈ), అసిస్టెంట్‌ ఇంజినీర్‌ (ఏఈ) పరీక్షలను రద్దు చేసింది. టౌన్‌ప్లానింగ్‌ బిల్డింగ్‌ ఓవర్సీస్‌ (టీపీబీవో), వెటర్నరీ అసిస్టెంట్‌ పరీక్షలు వాయిదా పడ్డాయి. గ్రూప్‌-1 ప్రిలిమినరీ పరీక్షను జూన్‌ 11న నిర్వహించనున్నట్టు టీఎస్‌పీఎస్సీ ప్రకటించింది. మిగతా రద్దయిన పరీక్షలతోపాటు వాయిదా పడిన వాటికి త్వరలోనే కొత్త తేదీలను ఖరారు చేసి ప్రకటించే అవకాశమున్నది.