- 10 రోజుల్లో 50 వేల బుకింగ్‌లు
నవతెలంగాణ-హైదరాబాద్‌బ్యూరో
          భద్రాద్రి సీతారాముల కల్యాణోత్సవ తలంబ్రాలకు భక్తుల నుంచి అనూహ్య స్పందన వస్తున్నదని టీఎస్‌ఆర్టీసీ తెలిపింది. కేవలం పది రోజుల్లో 50 వేల మంది తలంబ్రాల కోసం బుకింగ్‌ చేసుకున్నారని వివరించారు. శ్రీరామ నవమి సందర్భంగా భద్రాద్రి సీతారాముల కల్యాణ తలంబ్రాలను భక్తులకు అందజేయాలని తెలంగాణ రాష్ట్ర రోడ్డు రవాణా సంస్థ(టీఎస్‌ఆర్టీసీ) నిర్ణయించిన విషయం తెలిసిందే. రూ.116 చెల్లించి బుక్‌ చేసుకుంటే కల్యాణ అనంతరం తలంబ్రాలను భక్తులకు హౌండెలివరీ చేయనుంది. ప్రస్తుతం రాష్ట్రవ్యాప్తంగా తలంబ్రాల బుకింగ్‌ జరుగుతోంది. అయితే ఆర్టీసీ భక్తులకు మరో అవకాశాన్ని కల్పించింది. శ్రీరామ నవమి కల్యాణ సమయంలోనే కాకుండా.. తలంబ్రాలను ఎప్పుడైనా భక్తులు పొందే సదావకాశాన్ని కల్పించింది. కార్గో పార్శిల్‌ సెంటర్‌కు వెళ్లి రూ.116 చెల్లిస్తే నిర్ణీత సమయంలో తలంబ్రాలను భక్తులకు అందిస్తామని తెలిపారు. ఈ సందర్భంగా టీఎస్‌ఆర్టీసీ చైర్మెన్‌ బాజిరెడ్డి గోవర్థన్‌, మేనేజింగ్‌ డైరెక్టర్‌ వీసీ సజ్జనార్‌ మాట్లాడుతూ నియమ నిష్టలతో ధాన్యాన్ని గోటితో ఒలిచి తీసిన కోటి బియ్యం గింజలను తలంబ్రాలుగా భద్రాద్రి సీతారాముల కల్యాణోత్సవంలో ఉపయోగిస్తారనీ, విశిష్టమైన ఆ తలంబ్రాలను పొందేందుకు ప్రజలు ఆసక్తి చూపిస్తున్నారని చెప్పారు. రాష్ట్రంలోని అన్ని టీఎస్‌ఆర్టీసీ కార్గో పార్శిల్‌ కౌంటర్లలో వీటినిబుక్‌ చేసుకోవచ్చనీ, ఇతర సమాచారం కోసం టీఎస్‌ఆర్టీసీ లాజిస్టిక్స్‌ విభాగం ఫోన్‌ నంబర్లు 9177683134, 7382924900, 9154680020ను సంప్రదించాలన్నారు.