Sun 04 Apr 00:49:41.661194 2021
కనుపాపను ఆవరించిన
చీకటి కాటుక
జారిపోయే మెలకువను లెక్క చేయక
స్వప్నాల వీధికి లాక్కెళ్తుంది
చుక్కల తోపును తప్పుకుంటూ
ఆకాశ దండానికి వేలాడుతూ తక్కెడ
తనతో సరిదూగమంటూ
పదాలకు సవాలు విసురుతోంది
తూకానికి కూర్చున్న కాలం
అల్లిబిల్లిగా ఎగురుతూ గిరికీలు కొడుతూ
ఒక్కటొక్కటిగా మెల్లి మెల్లిగా
సంధి చేసుకుంటూ తరాజులోకి
చేరుతున్నాయి పదాలు
కాలం బరువుకు
తేలిపోతున్న పదాలు
దిగులుతో చిన్నబోయాయి
అప్పుడే అటుగా వచ్చిన
తోకచుక్కొకటి వాటిని పలకరిస్తూ
రెక్కలల్లార్చి వెళ్ళిపోయింది
పదాలకేదో తోచింది
తరువాత..
తారకల కాంతిని గ్రోలిన పదాలే
తక్కెట్లో మిగిలాయి
సరికొత్త వాక్యమేదో మిణుక్కుమంది
ఇప్పుడు కాలం కూడా వాక్యం పక్కనే
- నస్రీన్‌ ఖాన్‌,
9652432981
మీ స్నేహితులకు రికమెండ్ చెయ్యండి
