Sat 16 Oct 22:43:16.902364 2021
కనులు నింగికి అతుక్కుని
అడుగులు మాత్రం
భూమిలో ఉంటాయి
ఆదర్శం పెదవిపై ఉంటుంది
ఆచరణ మాత్రం శూన్యమై
దర్శనమిస్తుంది
తేనెలో మునకలేస్తూ మాటలు
వెన్నులో దిగుతూ కత్తులు
మాటకూ చేతకూ
ఎక్కడా పొసగదు
మేకవన్నెపులులివి
కన్నీళ్ళ నదులు
ప్రవహిస్తుంటాయి
కరగని గుండెలు
పక్కనే నడుస్తుంటాయి
నిరాశలో మునుగుతుంది ఒంటరితనం
ఒక సాంత్వన కోసం ఆరాటపడుతూ
చల్లని చెట్టు నీడకై
పరుగులు తీస్తూ
ఎడారిగుండెలు చినుకులకై ఎదురుచూస్తుంటాయి
ఆశ నిరాశల మధ్య
ఒక ఊగిసలాట ఉంటుంది
అలాగే జీవితం నెట్టుకొస్తూ ముఖాలు
సుడిగుండాలను ఎదురీదుతుంటే
గమ్యానికి చేరువలో
ఒక వెలుగుదివ్వె పిలవకమానదు
ఏదేమైనా
మిణుకుమంటున్న ఆశాదీపం
వెలుగుతూనే ఉండాలి
కలల రెక్కలు విప్పుకుని
ఎగురుతూనే ఉండాలి
మనసంతా వెన్నెల
కురుస్తూనే ఉండాలి
- పద్మావతి రాంభక్త, 9966307777
మీ స్నేహితులకు రికమెండ్ చెయ్యండి
