Sun 30 Oct 00:56:05.671276 2022
ఎన్నేళ్ళ నుంచి
అదే నువ్వు
తెరలు తెరలుగా
గాలిలో గిరికీలు కొడుతూ
చెవులకు
చక్కిలిగిలి పెడుతూ నీ నవ్వు
మాటల మంత్రం వేస్తూ
మైమరపిస్తూ
తీరొక్క పరిమళాలను
పరిచయం చేస్తూ
పెదవుల చివర చిరునవ్వులు
తోరణాలుగా వేళ్ళాడదీసి
చురుకుగా
చుట్టూ చేరిన వారిని
ఆకట్టుకుంటూ
అనుభవాలను పంచుతూ
చాకచక్యంగా
జీవితపు పుటలలో
మునుపెన్నడూ స్పశించని
వేర్వేరు కోణాలను చూపిస్తూ
పూలతోటలను బహూకరిస్తూ
మిణుగురులను
దోసిట్లో పోస్తూ
నువ్వు మాత్రం
బరువైన సముద్రాలను
జేబులో వేసుకుని
రికామీగా తిరిగేస్తూ
అవునూ
నువ్వు ఎంతో
అర్ధమైనట్టే ఉంటావు
కానీ ఉన్నట్టుండి
అపరిచిత ముఖమై
ఆకాశంలా నక్షత్రంలా
నిజంలా నీడలా
ఎప్పటికప్పుడు
సరికొత్త పుస్తకంలోని
చదవని పేజీలా
ఇంద్రధనుస్సు అంచులకు అద్దిన
ఏడు రంగులను మించిన
మరొక వింత వర్ణంలా
అంతెందుకు
అదే నువ్వు
నిత్యనూతనమై
ప్రవహించే వెన్నెలనదిలా
వెండి వెలుతురు చిమ్మే అద్భుతదీపంలా
- పద్మావతి రాంభక్త
9966307777
మీ స్నేహితులకు రికమెండ్ చెయ్యండి
