నవతెలంగాణ-చందానగర్‌
రోడ్డు దాటుతుండగా కారు ఢీ కొని వ్యక్తి మృతి చెందిన సంఘటన చందానగర్‌ పోలీస్‌ స్టేషన్‌ పరిధిలో చోటుచేసుకుంది. పోలీసులు తెలిపిన వివరాల ప్రకారం పాపిరెడ్డి కాలానికి చెందిన మొగుడప్ప చెత్త సేకరించే ఆటో నడుపుతుంటాడు. రోజు లాగానే మొగుడప్ప సోదరుడు, తండ్రి, వాళ్ళ చిన్నాన్న చెత్త సేకరించడంలో సహాయం చేస్తుంటారు. బుధవారం చెత్త సేకరించేందుకు కలిసి వెళ్లిన వారు సుప్రీం స్పోర్ట్స్‌ స్టూడియో, డోయన్స్‌ కాలనీ వద్ద టీ తాగేందుకు వెళ్లారు. అదే సమయంలో మొగుడప్ప చిన్నాన్న రాంచందర్‌ (53) మూత్ర విసర్జన చేసేందుకు రోడ్డు దాటబోయాడు. ఇదే క్రమంలో వేగంగా వచ్చిన కేఏ04 ఎంఎల్‌ 8780 నెంబర్‌ గల ఆల్టో కారు రాంచందర్‌ను ఢీ కొట్టడంతో తల పగిలిపోయి చెవి, ముక్కు నుండి రక్తం వచ్చింది. వెంటనే 108 అంబులెన్స్‌కు కాల్‌ చేశారు. అంబులెన్స్‌ సిబ్బంది వచ్చి పరీక్షించి అప్పటికే మృతిచెందాడని ధృవీకరించారు. కుటుంబ సభ్యులు ఇచ్చిన ఫిర్యాదు మేరకు పోలీసులు కేసు నమోదు చేసుకుని దర్యాప్తు చేస్తున్నారు.