- కొత్తూరు ఎంపీపీ పిన్నింటి మధుసూదన్‌ రెడ్డి
నవతెలంగాణ-కొత్తూరు
నేటి మహిళా లోకానికి స్ఫూర్తి చాకలి ఐలమ్మ అని కొత్తూరు మండల పరిషత్‌ అధ్యక్షులు పిన్నింటి మధుసూదన్‌ రెడ్డి అన్నారు. సోమ వారం కొత్తూరు ఎంపీడీవో కార్యాల యంలో చాకలి ఐలమ్మ జయంతి సందర్భంగా ఆమె చిత్రపటానికి పూలమాల వేసి ఘనంగా నివాళులర్పించారు. అనంతరం ఆయన మాట్లాడుతూ.. అన్యాయాన్ని ఎదిరించి గెలిచిన ధీశాలి అని అన్నారు. పుడమికి పురుడు పోసి, పుట్ల కొద్ది పంట తీసి, దొరల నుంచి భూమిని, పంటను కాపాడుకున్న మాతృమూర్తి అని కొనియాడారు. తెలంగాణ సాయుధపోరాటంలో బడుగు బలహీన వర్గాల హక్కుల కోసం నిలబడిన వీరనారి చాకలి ఐలమ్మ అని అన్నారు. నిజాం నిరంకుశ పాలనకు విముక్తి కల్పించేందుకు చాకలి ఐలమ్మ చేసిన స్ఫూర్తితోనే మలిదశ తెలంగాణ ఉద్యమం జరిగిందన్నారు. కార్యక్రమంలో ఎంపీడీవో శరత్‌ చంద్ర బాబు, సర్పంచులు కట్న రాజు, రవి నాయక్‌, ఉప సర్పంచ్‌ దశరథ్‌ నాయక్‌, ఎంపీఓ నరసింహ, గ్రామ కమిటీ అధ్యక్షుడు జయేందర్‌ రెడ్డి, మాజీ ఎంపిటిసి మోడీ దర్శన్‌, కార్యాలయం సిబ్బంది పాల్గొన్నారు.
