- పదోన్నతులలో అన్ని ఖాళీలను భర్తీ చేయాలి
- బదిలీల ప్రక్రియ ముగిసిన వెంటనే నియామకాలకు నోటిఫికేషన్‌ ఇవ్వాలి : టీఎస్‌యూటీఎఫ్‌
నవతెలంగాణ బ్యూరో - హైదరాబాద్‌
పదోన్నతులకు అర్హత కలిగిన ఉపాధ్యాయుల సీనియారిటీ జాబితాలు సబార్డినేట్‌ సర్వీస్‌ నిబంధనలకు అనుగుణంగా అన్ని జిల్లాల్లో ఒకే రకంగా సమగ్రంగా రూపొందించాలని టీఎస్‌యూటీఎఫ్‌ రాష్ట్ర కార్యదర్శి వర్గ (ఆఫీసు బేరర్స్‌) సమావేశం డిమాండ్‌ చేసింది. తెలంగాణ రాష్ట్ర ఐక్య ఉపాధ్యాయ ఫెడరేషన్‌ (టీఎస్‌యూటీఎఫ్‌) రాష్ట్ర ఆఫీసు బేరర్ల సమావేశం ఆదివారం టిఎస్‌ యుటిఎఫ్‌ రాష్ట్ర కార్యాలయంలో రాష్ట్ర అధ్యక్షులు కె.జంగయ్య అధ్యక్షతన జరిగింది. ఈ సందర్భంగా ఎమ్మెల్సీ నర్సిరెడ్డి మాట్లాడుతూ ఉపాధ్యాయుల బదిలీలు, పదోన్నతుల ప్రక్రియ పూర్తి అయిన వెంటనే అన్ని ఖాళీలకు నోటిఫికేషన్‌ ఇవ్వాలని తద్వారా వచ్చే విద్యా సంవత్సరం ప్రభుత్వ పాఠశాలల్లో ఉపాధ్యాయుల కొరత లేకుండా చూడాలని కోరారు. పండితులు, వ్యాయమ ఉపాధ్యాయులకు అందరితోపాటే పదోన్నతులు ఇవ్వాలనీ, రాష్ట్ర ముఖ్యమంత్రి అసెంబ్లీలో ప్రకటించిన విధంగా 5,571 ప్రాథమిక పాఠశాలల ప్రధానోపాధ్యాయుల పోస్టులను మంజూరు చేయాలని డిమాండ్‌ చేశారు. జిఓ 317 ద్వారా పొరుగు జిల్లాలకు కేటాయించబడిన ఉపాధ్యాయులను పదోన్నతుల అనంతరం ఏర్పడిన ఖాళీల్లో సొంత జిల్లాలకు తీసుకురావాలనీ, మిగిలిన 13 జిల్లాల దంపతుల బదిలీలు పూర్తి చేయాలని సూచించారు.ప్రధాన కార్యదర్శి చావ రవి మాట్లాడుతూ ఉపాధ్యాయుల అభ్యంతరాలను స్వీకరించి సమగ్రమైన జాబితాలు రూపొందించాలన్నారు. పదోన్నతుల సందర్భంగా ఆసక్తి ఉన్న ఉపాధ్యాయులతో అన్ని ఖాళీలను భర్తీ చేయాలని కోరారు. ఇటీవల జరిగిన 615 స్పౌజ్‌ బదిలీలు పదోన్నతులకు నిర్దేశించిన పోస్టులలోనే చేసినందున తద్వారా ఆయా జిల్లాల్లో ఏర్పడిన ఖాళీలను పదోన్నతుల కోటాలోనే చేర్చాలని డిమాండ్‌ చేశారు. రంగారెడ్డి, మేడ్చల్‌ తదితర జిల్లాల్లో పైరవీ బదిలీల ద్వారా సబ్జెక్టేతర ఖాళీ (అగైనెస్ట్‌ వేకన్సీ) లో నియమించబడిన ఉపాధ్యాయుల పోస్టులను ఆయా సబ్జక్టుల పదోన్నతులకు ఖాళీలుగా చూపాలని రవి డిమాండ్‌ చేశారు. ఆశ్రమ పాఠశాలలు, మోడల్‌ స్కూల్‌, గురుకుల ఉపాధ్యాయుల బదిలీలు, పదోన్నతులు, కేజీబీవీ బదిలీలు నిర్వహించాలని ప్రభుత్వాన్ని కోరారు. ఉద్యోగుల ఆరోగ్య పథకం అమలుపై సంఘాలతో సమావేశం నిర్వహించాలనీ, అన్ని యాజమాన్యాల ఉపాధ్యాయులకు ఆరోగ్యకార్డులు ఇవ్వాలని డిమాండ్‌ చేశారు. హైదరాబాద్‌ ఉపాధ్యాయ నియోజకవర్గం ఎమ్మెల్సీ ఎన్నికల్లో టిఎస్‌ యుటిఎఫ్‌ అభ్యర్థి పాపన్నగారి మాణిక్‌ రెడ్డి గెలుపు కోసం అన్ని జిల్లాల్లో విస్తృతంగా ప్రచారం నిర్వహించాలని సమావేశం తీర్మానించింది. ఈ సమావేశంలో రాష్ట్ర ఉపాధ్యక్షులు సీహెచ్‌ రాములు, కోశాధికారి టి.లక్ష్మారెడ్డి, ఎమ్మెల్సీ అభ్యర్థి మాణిక్‌ రెడ్డి, రాష్ట్ర కార్యదర్శులు కె.సోమశేఖర్‌, ఎం. రాజశేఖర్‌ రెడ్డి, జి నాగమణి, ఇ.గాలయ్య, బి.రాజు, ఎస్‌.రవిప్రసాద్‌, కె.రవికుమార్‌, జి శ్రీధర్‌, ఎ సింహాచలం, వై జ్ఞానమంజరి, ఎస్‌. కె.మహబూబ్‌ అలీ పాల్గొన్నారు.