- 'నువ్వెంత నీ బతికెంత అంటూ' ఘాటు వ్యాఖ్యలు
- సోషల్‌ మీడియాలో ఆడియో హల్‌చల్‌
నవతెలంగాణ-జోగిపేట
బీజేపీ కార్యకర్తపై మాజీమంత్రి బాబు మోహన్‌ దుర్భాషలాడిన ఆడియో సోషల్‌ మీడియాలో మంగళవారం హల్‌చల్‌ సృష్టిస్తోంది. ఆడియోలో ఉన్నదాని ప్రకారం.. సంగారెడ్డి పట్టణానికి చెందిన బీజేపీ కార్యకర్త వెంకట రమణ.. బాబుమోహన్‌కు ఫోన్‌ చేసి 'సార్‌ మీతో ఇకనుంచి కలిసి పనిచేస్తామని తెలిపాడు. దాంతో 'నువ్వెంత నీ బతుకెంత' అంటూ కార్యకర్తపై బాబుమోహన్‌ విరుచుకుపడ్డాడు. తాను ప్రపంచస్థాయి నాయకుడినని, బాబూమోహన్‌ డౌన్‌డౌన్‌ అంటావా అంటూ అతడిపై ధ్వజమెత్తాడు. రికార్డు చేసుకో రా.. పార్టీ ఆఫీస్‌కు పంపించుకో.. అంటూ కామెంట్స్‌ సైతం చేశారు. మీకు, రాష్ట్ర పార్టీ అధ్యక్షులు బండి సంజయ్‌ అన్నకు క్షమాపణలు కోరుతాను అనగానే బండి సంజయ్‌ ఎవడ్రా.. నా తమ్ముడంటూ వివాదస్పద వ్యాఖ్యలు చేశారు. తాను మంత్రిగా ఉన్న సమయంలో అనేక అభివృద్ధి పనులు చేపట్టానని గుర్తుపెట్టుకో అంటూ వ్యాఖ్యలు చేశారు. మరోసారి తనకు ఫోన్‌ చేయొద్దని.. చేస్తే చెప్పుతో కొడతానని హెచ్చరించారు. ఈ ఆడియో రికార్డు ప్రస్తుతం సోషల్‌ మీడియాలో వైరల్‌గా మారింది. కాగా, బాబుమోహన్‌ ఆడియో వ్యాఖ్యలపై స్థానిక జిల్లా బీజేపీ నాయకులు కొత్త శ్రీనివాస్‌, జగన్నాథం, పట్టణ బీజేపీ అధ్యక్షుడు సయ్య సాయిలు ఖండించారు. మాజీ జెడ్పీ చైర్మెన్‌ బాలయ్య వర్గంలో చేరిన వెంకట రమణ సోమవారం రాత్రి బాబూమోహన్‌కు ఉద్దేశపూర్వకంగానే ఫోన్‌ చేసి రెచ్చగొట్టాడని, దీనిని పూర్తిగా ఖండిస్తున్నామన్నారు. ఈ మేరకు వారు ఒక ప్రకటన విడుదల చేశారు. గత అసెంబ్లీ ఎన్నికల్లో బీజేపీకి వ్యతిరేకంగా పనిచేసిన కొందరు నాయకులు కుట్రలు పన్ని బాబూమోహన్‌కు వెంకటరమణతో రాత్రిపూట ఫోన్‌ చేయించారని వారు ఆరోపించారు.
