- 'ఆ పాట నాకేంతో నచ్చింది.. మీకూ నచ్చుతుంది..'అంటూ కేటీఆర్‌ ట్వీట్‌
నవతెలంగాణ బ్యూరో-హైదరాబాద్
ముఖ్యమంత్రి కే. చంద్రశేఖర రావు మనవడు, మంత్రి కేటీఆర్‌ కొడుకు హిమాన్షు ఇంగ్లీషులో పాడిన పాట సామాజిక మాధ్యమాల్లో వైరల్‌ అవుతున్నది. హిమాన్షు తొలిసారి ఒక పాటను పాడి, దాన్ని యూట్యూబ్‌, ఇతర సామాజిక మాధ్యమ వేదికల ద్వారా పంచుకున్నారు. ప్రసిద్ధ ఇంగ్లీష్‌ గీతం గోల్డెన్‌ అవర్‌ పాటకు కవర్ సాంగ్‌ రూపంలో తనలో ఉన్న ఈ కొత్త టాలెంట్‌ని హిమాన్షు బయటపెట్టారు. ఆ పాటను మంత్రి కేటీఆర్‌ ట్విట్టర్‌ ద్వారా ప్రజలతో పంచుకున్నారు. తన కుమారుడు పాడిన పాట తనకెంతో బాగా నచ్చిందనీ, మీ అందరికీ నచ్చుతుందని ఆశిస్తున్నానంటూ కేటీఆర్‌ ట్వీట్‌ చేశారు. హిమాన్షు భావోద్వేగపూరితంగా తాతయ్యతో తనకున్న అనుబంధాన్ని పంచుకున్నారు.
తన అత్యంత ప్రియమిత్రుడు, నా స్ఫూర్తి ప్రధాత మా తాతయ్య కేసీఆర్‌ 69 ఏండ్ల క్రితం ఈ రోజు జన్మించారంటూ ప్రారంభించి, సామాజిక, నైతిక విలువలను నేర్పించిన తాతకు ధన్యవాదాలు అంటూ పాటను ముగించారు. ఎవరిని వివక్షతతో చూడకుండా, అందర్నీ సమానంగా చూడగలిగేలా తనను తాతయ్య తయారు చేశారనీ, ముఖ్యంగా సమాజం పట్ల తనలో సేవా దృక్పథాన్ని నింపిన ఆయనకి ధన్యవాదాలని హిమాన్షు తెలిపారు. ఎంతో బిజీగా ఉన్నా, తమ కుటుంబానికి ముఖ్యంగా, తనకోసం తాతయ్య అత్యధిక సమయం కేటాయిస్తారని పేర్కొన్నారు.
