- హాల్‌టికెట్ల డౌన్‌లోడ్‌ ప్రక్రియ షురూ
నవతెలంగాణ బ్యూరో - హైదరాబాద్‌
డివిజనల్‌ అకౌంట్స్‌ ఆఫీసర్‌ (డీఏవో) పోస్టుల భర్తీకి సంబంధించి ఈనెల 26న రాతపరీక్ష జరగనుంది. దరఖాస్తు చేసిన అభ్యర్థులు హాల్‌టికెట్లను డౌన్‌లోడ్‌ చేసుకునే ప్రక్రియ ప్రారంభమైందని తెలంగాణ రాష్ట్ర పబ్లిక్‌ సర్వీస్‌ కమిషన్‌ (టీఎస్‌పీఎస్సీ) కార్యదర్శి అనితా రామచంద్రన్‌ సోమవారం ఒక ప్రకటనలో తెలిపారు. మొత్తం 1,06,253 మంది దరఖాస్తు చేశారని వివరించారు. వారిలో ఇప్పటి వరకు 39,913 మంది అభ్యర్థులు హాల్‌టికెట్లను డౌన్‌లోడ్‌ చేసుకున్నారని పేర్కొన్నారు. 53 డీఏవో పోస్టుల భర్తీకి గతేడాది ఆగస్టు నాలుగో తేదీన టీఎస్‌పీఎస్సీ నోటిఫికేషన్‌ను జారీ చేసిన విషయం తెలిసిందే. ఇతర వివరాలకు www.tspsc.gov.in వెబ్‌సైట్‌ను సంప్రదించాలని సూచించారు.